Երկուշաբթի՝ դեկտեմբերի 23-ին, Ամանորի եւ Ս. Ծննդեան տօների առիթով, Իրանի Հանր. նախագահի Ռազմավարական հարցերով տեղակալ դոկտ. Ջաւադէ Զարիֆը, իր տիկնոջ եւ նրանց ուղեկցող պատւիրակութեան ընկերակցութեամբ այցելեցին ազգային առաջնորդարան եւ հանդիպում ունեցան Տ. Առաքել աբղ. Գատեհճեանի, Իրանի Իսլ. խորհրդարանում իրանահայութեան զոյգ Պատգամաւորների եւ Ազգային իշխանութեան ու Հոգեւոր Դասի ներկայացուցիչների հետ:
Ազգային առաջնորդարանի դահլիճում կայացած հանդիպման սկզբին, Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը ողջունեց հիւրերի ներկայութիւնը եւ հակիրճ կերպով ներկայացրեց կառոյցն ու իրանահայ երեք թեմերը: Նա նմանօրինակ այցելութիւնները պետութեան եւ փոքրամասնութիւնների միջեւ փոխյարգանքի եւ համագործակցութեան արտայայտութիւններից մէկը համարելով, ընդգծեց յարաբերութիւնների աւելի սերտացման կարեւորութիւնը:
Հայր Սուրբն իր ելոյթի ընթացքում Թեհրանի հայոց թեմի առաջնորդ Տ. Սեպուհ արք. Սարգսեանի ողջոյնի խօսքերը փոխանցելով, շնորհակալութիւն յայտնեց հիւրերին՝ ներկայութեան ու շնորհաւորանքների համար: Նա իր արտայայտութիւններում ընդգծեց, որ Իրանի հայ համայնքը՝ պարսիկ հայրենակիցների հետ եղբայրական եւ բարեկամական կապն ընդմիշտ պահպանել եւ երկրի բարգաւաճման ու զարգացման համար՝ տարբեր բնագաւառներում մեծ ներդրում եւ գործօն դերակատարութիւն է ունեցել:
Դոկտ. Ջաւադէ Զարիֆը մօտալուտ Ամանորեայ եւ Ս. Ծննդեան տօնական օրերի առիթով շնորհաւորանքներ եւ բարեմաղթանքներ յայտնելով, փոխանցեց Իրանի Իսլ. Հանրապետութեան նախագահ Մասուդ Փեզեշքիանի ողջոյն եւ Թեմակալ առաջնորդի շուտափոյթ ապաքինման մաղթանքի խօսքերը: Նա իր արտայայտութիւններում ընգծեց, որ անտարակոյս բոլոր իրանցիներս պատկանում ենք այս երկրին եւ քրիստոնեայ հասարակութիւնը համարւում է Իրանի ժողովրդի անբաժանելի մասնիկը: Դոկտ. Զարիֆը կարեւորութեամբ անդրադարձաւ պարտադրեալ պատերազմի տարիների ընթացքին, երկրի ամբողջականութիւնը պաշտպանելու համար իրանահայութեան ցուցաբերած զոհողութիւններին ու սխրագործութիւններին:
Հանդիպման աւարտին, հիւրերին նւիրւեց «Իրանի հայկական եկեղեցիներ» խորագրով՝ պարսկերէն եւ անգլերէն լեզւով հրատարակւած գիրքը, որից յետոյ այցելութիւն կատարւեց Ս. Սարգիս եկեղեցի:
Ազգային առաջնորդարանի հանրային Կապ
