Գառնիկ Դանիէլեանը՝ Արցախի ռազմաքաղաքական ղեկավարութեան՝ Բաքւի բանտերում կտտանքների ենթարկելու մասին. «Անպատւութիւն է, ուղիղ ապտակ՝ բոլոր հայերին»
![](/wp-content/uploads/2024/08/3952-780x470.jpg)
«ԱԼԻՔ» – ՀՅԴ Տաւուշի Մարզային կոմիտէի ներկայացուցիչ, ՀՀ ԱԺ «Հայաստան» խմբակցութեան պատգամաւոր Գառնիկ Դանիէլեանը «Հայելի» ակումբում սեպտեմբերի 2-ին Արցախի անկախութեան օրւան ընդառաջ ասել է. «Մենք չենք կարող հանգիստ գլուխներս դնել բարձին քնել եւ ապրել, քանի դեռ մեր արժանապատւութիւնը խոցւած է, քանի դեռ մենք ապրում ենք անպատւութեան մէջ: Չի կարող հանգիստ ապրել իւրաքանչիւր հայ մարդ ստեղծւած այս իրականութեան մէջ:
Պէտք է հասկանանք, որ սա անմիջապէս մեր արժանապատւութեան հարցն է: Այս անպատւութիւնը որ կայ, որ Արցախի ռազմաքաղաքական ղեկավարութիւնը Ադրբեջանի բանտերում կտտանքների է ենթարկւում, ուղիղ ապտակ է բոլոր հայ մարդկանց, ուղիղ խօսում է այն մասին, որ մենք պէտք է աւելի վճռական լինենք, գործենք աւելի գործնական: Չկայ աւելի կարեւոր հարց, քան նրանց օր առաջ Ադրբեջանի բանտերից ազատ արձակելը: Եւ COP 29-ին ընդառաջ մեր արտաքին եւ ներքին ամբողջ գործունէութիւնը պէտք է լինի մէկը. անել ամէն ինչ, որպէսզի ճնշում գործադրւի բռնապետական ռեժիմի վրայ, որպէսզի մեր գերիները ազատ արձակւեն»:
Պատգամաւորը դիմել է նաեւ աշխարհասփիւռ հայութեանը, որ նրանց մասնակցութիւնը եւ ճնշումը շատ կարեւոր է. «Սփիւռքի մեր հայրենակիցները պէտք է իրենց երկրների կառավարութիւններին դիմեն կոչով, անհնազանդութեան ակցիաներ, ցոյցեր, միտինգներ անեն՝ ստիպելով, որ տւեալ կառավարութիւնը յստակ իր առաջնային գործառոյթը համարի ճնշումը ադրբեջանական կողմի վրայ: Մոռացէք: Այս իշխանութիւնները մինչեւ այսօր որեւէ քայլ չեն արել, որպէսզի պատանդառութիւնից ազատեն գերութեան մէջ գտնւող մեր եղբայրներին: Հակառակը, ես խորին համոզմունք ունեմ, որ այս իշխանութիւնը ամէն ինչ անում է, որպէսզի նրանք մնան գերութեան մէջ, որովհետեւ այս մարդկանց Հայաստանում գտնւելը իրենց նեղութիւններ կը պատճառի»:
Գառնիկ Դանիէլեանը հաւաստիացրել է, որ «Սրբազան պայքար»-ը դրա համար գործօն քայլեր է ձեռնարկում. «Սեպտեմբեր ամսից կը լինեն հաւաքներ, ֆորումներ, գործողութիւններ, որոնց առումով մեծածաւալ աշխատանք է կատարւում: Եւ սա լինելու է ջրբաժան»:
Նա նաեւ խօսել է «Սրբազան պայքար»-ի նախատեսւած ակտիւի հաւաքի մասին, որը պէտք է կայանար Կարէն Դեմիրճեանի անւան մարզահամերգային համալիրում: «Հաւաքին, որը շատ կարեւոր է, պէտք է մասնակցէր Շարժման կորիզի 10 հազար ակտիւիստ եւ որի ժամանակ պէտք է ամփոփւէր այս ամբողջ ընթացքը, քննարկւէին հետագայ անելիքները: Սակայն խուսափողական վարքագիծ է դրսեւորում ՄՀՀ-ի տնօրէնը: Այսինքն, կայ իշխանութեան կողմից յստակ հրահանգ՝ այդ տարածքը «Սրբազան պայքար»-ին չտրամադրելու վերաբերեալ: Բայց ինչպէս Սրբազան Հայրն ասաց, մենք մինչեւ վերջ պահանջատէր ենք լինելու եւ ստիպելու ենք, որպէսզի այդ տարածքը տրամադրւի»: