Միջին տարիքում արեան պարզ անալիզը կարող է կանխատեսել Ալցհէյմերի հիւանդութիւնը՝ սկսւելուց շատ առաջ

Գիտնականները պարզել են, որ միջին տարիքում արեան թրոմբոցիտների ակտիւութեան պարզ թեստը մի օր կարող է դառնալ Ալցհէյմերի հիւանդութեան վաղ փուլում՝ նոյնիսկ առաջին ախտանիշների ի յայտ գալուց առաջ, ռիսկը գնահատելու միջոց։

Սան Անտոնիոյի Տեխասի համալսարանի Գլէն Բիգսի անւան Ալցհէյմերի եւ նէյրոդեգեներատիւ հիւանդութիւնների ինստիտուտի հետազօտողների կողմից Նիւ Եօրքի համալսարանի հետ համատեղ անցկացւած ուսումնասիրութիւնը ցոյց է տւել կապը թրոմբոցիտների մակարդուկներ առաջացնելու ունակութեան և Ալցհէյմերի հիւանդութեան վաղ նշանների միջեւ, որոնք յայտնաբերւել են պոզիտրոնային էմիսիոն տոմոգրաֆիայի եւ մագնիսական ռեզոնանսային պատկերման (ՄՌՏ) միջոցով միջին տարիքի՝ մօտաւորապէս 56 տարեկան չափահաս մարդկանց մօտ։

Հետազօտութեան արդիւնքները հրապարակւել են Neurology բժշկագիտական հանդէսում։

Հետազօտողները վերլուծել են Ֆրամինգհեմի սրտի երկարաժամկէտ ուսումնասիրութեանը մասնակցած 382 մասնակցի տւեալները, որոնք դեմենցիա չունէին։ Օգտագործելով թրոմբոցիտների մակարդուկի առաջացումը չափող մեթոդ՝ հետազօտողները պարզել են, որ ուղեղում թրոմբոցիտների ագրեգացիայի աւելի բարձր մակարդակ ունեցող մարդիկ աւելի հաւանական է, որ ունենան բետա-ամիլոիդային եւ տաու սպիտակուցների բարձր մակարդակ, որոնք Ալցհէյմերի հիւանդութեան հիմնական մարկերներն են։

Հեղինակները նշում են, որ ամենաակնառու կապը նկատւում է թրոմբոցիտների համեմատաբար ցածր սկզբնական ակտիւութիւն ունեցող մարդկանց մօտ, մինչդեռ այս ազդեցութիւնն աւելի քիչ է արտայայտւած բարձր ակտիւութիւն ունեցողների մօտ։

Հետազօտողների կարծիքով, թրոմբոցիտները կարող են ծառայել որպէս «կամուրջ» անօթային խանգարումների՝ ուղեղի արեան անօթների վատթարացման եւ Ալցհէյմերի հիւանդութեան զարգացմանը յանգեցնող նէյրոդեգեներատիւ գործընթացների միջեւ։

Գիտնականներն ընդգծում են, որ այս թեստը գործնականում դեռեւս լայնօրէն կիրառելի չէ. անհրաժեշտ են հետագայ կլինիկական ուսումնասիրութիւններ՝ որոշելու համար, թէ արդեօք յայտնաբերւած օրինաչափութիւնը պահպանւում է ժամանակի ընթացքում։ Այնուամենայնիւ, արդիւնքներն արդէն իսկ յոյս են ներշնչում, որ ապագայում ի յայտ կը գայ հիւանդութեան ռիսկը դրա կլինիկական դրսեւորումներից շատ առաջ որոշելու ունակ արեան պարզ անալիզ։

News.am