Ատրպատականի հայոց թեմը գումարեց իր հերթական Պատգամաւորական ժողովը

Ատրպատական, ազգային առաջնորդարան, Թաւրիզ – Ուրբաթ, նոյեմբերի 13-ի առաւօտեան ժամը 10:30-ին, Ատրպատականի հայոց թեմի Պատգամաւորական ժողովի 15-րդ նիստը գումարւեց Թեմի «Մելիք Թանգեան» թանգարանի առաջին յարկի սրահում, նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի:

Նորին Սուրբ Օծութիւն Տ. Տ. Արամ Ա Վեհափառ Հայրապետի հրահանգով, 2027 թ.-ի յունւար ամսին, Մեծի Տանն Կիլիկիոյ Կաթողիկոսութեան Անթիլիասի Մայրավանքում տեղի ունենալիք Ազգային Ընդհանուր ժողովին առ ի նախապատրաստութիւն, Թեմի դիւանը պատրաստել էր արդէն բազմէջեայ զեկոյց՝ քառամեայ գործունէութեան, որը փոխանցւելու է Անթիլիասի Կենտրոնական վարչութեան դիւանին:

Սրբազան հօր արտասանած «Տէրունական աղօթք»-ով բացումը կատարւեց ժողովական նիստին: ժողովի դիւանը՝ գլխաւորութեամբ Արմինէ Վահրամեանի (ատենապետ), միասնաբար Սաքօ Մեջլումեանի (Բ ատենապետ), եւ Սարինէ Մեջլումեանի (Բ ատենադպիր), նիստը բացւած յայտարարեց: Ատենապետուհի Արմինէ Վահրամեանը ողջունելով ներկաներին, առաջին հերթին անդրադարձաւ ժողովի գումարման վայրին՝ «Մելիք Թանգեան» թանգարանի վերանորոգւած տեսքի եւ մշակութային հարուստ ժառանգութեան նկատմամբ Թեմի ունեցած բծախնդիր ու ապագայատեսիլ մօտեցմանը: Անթիլիասում կայանալիք Ընդհանուր ժողովին, որի մասնակցութեամբ Թեմը ներկայացնում է եկեղեցական ու ազգային գործունէութեան պատկերը: Ապա, նա ներկայացրեց օրւայ օրակարգի նիւթերը, եւ ընթերցւեցին վերջին տարիների գործունէութեանց տեղեկագրերը:

Թեմի կրօնական, կրթական, քաղաքական, մշակութային, շինարարական, տնտեսական, ու այլ բնագաւառների մասին Թեմական խորհրդի պատրաստած լայնածաւալ տեղեկագիրը, բոլոր ներկաները միաձայնութեամբ գնահատեցին, ու վաւերացրին:

Առաջնորդ Սրբազանը իր հայրական խօսքով բարձր գնահատեց Ազզային իշխանութեան, եւ յատկապէս Թեմական խորհրդի գործունէութիւնը. «Երկրի նոյնիսկ դժնդակ պայմաններում, նիւթական ահաւոր դրութեան մէջ գտնւելով, Թեմական խորհուրդը իր կարողութիւնից շատ աւելի վեր միջոցների դիմեց: Նախ, Թեմի գործունէութեան շարունակականութիւնը ապահովելով, կալւածային խնդիրների բացթողումը կանխելով, ինչպէս նաեւ կարելի պայմաններում ապահովելով պաշտօնէութեան վճարումների միջոցները», ասաց Սրբազանը: Նա իր գնահատանքը յայտնեց նաեւ կրօնական-եկեղեցական կեանքում, ինչպէս նաեւ ազգային-կրթական, ու մշակութային մարզերից ներս ամէն ճիգ ի գործ դնող անձերին, հոգեւորական դասից սկսեալ, մինչեւ կրթական ու մշակութային կեանքում ծառայողների ներդրումները բարձրօրէն գնահատելով:

Առաջնորդ Սրբազան հայրը եզրափակեց իր խօսքը, ասելով, որ Վեհափառ Հայրրապետը եւ Ազգային Ընդհանուր ժողովը վստահաբար բարձր գնահատելու են Ատրպատականում իր գոյութիւնը պահպանող Թեմի ազզանւէր զաւակաց գերագոյն ճիգը ինքնապահպանութեան եւ Թեմի գոյատեւման: Վերջապէս նա յիշեցրեց, որ ամենադժւարին պայմաններում «Մելիք Թանգեան» թանգարանի շքեղ տեսքով վերաբացումը, տեղափոխւելով «Թամարեան» շէնք, պատմական անջնջելի փաստ է մնալու, այս շրջանին Թեմի պատասխանատւութիւնը ստանձնած ծառայողների հերոսական անձնանւիրմանը դիմաց:

Թեմականի ատենապետ Գագիկ Ջորջեանը իր երախտագիտութիւնը յայտնեց նախ Սրբազան հօրը, եւ ապա Պատգամաւորական ժողովին, որ իրենց զօրակցութիւնը ցուցաբերեցին, տնտեսական ահաւոր ժամանակահատւածում, համբերելով նեղութիւններին:

Նիւթական զեկոյցի ծիրից ներս, մանրամասն ներկայացւեց եկամուտի եւ ծախսերի ցուցակը, բոլորի կողմից գնահատւելով դրանց թափանցիկութիւնը, եւ այն ճիգը, որը շահի իմաստով գործանապէս ցուցաբերել էր Թեմական խորհուրդը:

Օրակարգի հիման վրայ ընտրութիւն կատարւեց Սրբազան հօր հետ Անթիլիասի Մայրավանք մեկնող երկու ժողովականների՝ յանձինս երկու կազմերի ատենապետների, ապա ընթացիկ հարցերի պատասխաններ տրւեցին ե՛ւ Թեմական խորհրդի, ե՛ւ Դիւանի կողմից, որը նաեւ իր գնահատանքը յայտնեց Սրբազան հօր, եւ Թեմական խորհրդի իրագործած աշխատանքներին:

Առաջնորդ Սրբազանը իր օրհնութեան եզրափակիչ խօսքով դարձեալ վեր առաւ Ազգային իշխանութեան զոյգ կազմերի ինքնանւէր աշխատանքը, եւ «Պահպանիչ» աղօթքով յարատեւ խաղաղութիւն մաղթեց աշխարհին, եւ մանաւանդ Իրանի Հանրապետութեան համար:

Նշենք, որ ժողովի մասնակիցները առիթ ունեցան միասնաբար այցելելու Թանգարանի յարդարւած բաժինները, ինչպէս նաեւ երկրորդ յարկի շինարարական բաժինը, որը շուտով իր աւարտին է հասնելու:

Բոլոր ժողովականները կէսօրւայ ճաշի հիւրը եղան Ազգային առաջնորդարանի, միասնաբար վայելելով հաճելի պահեր, երբ դեռեւս շարունակւեցին մտքերի փոխանակումներ, ընկերական միջավայրում, փոխադարձ յարգանքով: