«ԱԼԻՔ», Կ.Դ. – Երէկ՝ մարտի 8-ի առաւօտեան «Արարատ» մարզաւանի արեւելեան տարածքում իրականացաւ 80 ծառերի տնկման ծրագիր, նւիրւած Հ. Մ. «Արարատ» կազմակերպութեան հիմնադրման 80-ամեակին եւ «Արարատ» մարզաւանի հիմնադրման 50-ամեակին: Ծառատունկից առաջ, նախաձեռնութեան մասին հակիրճ բացատրութիւններ փոխանցեց Հ.Մ.Ա.Կ.-ի հիմնադրման 80-ամեակի յանձնախմբի նախագահ Համլետ Խալոյեանը, նշելով, որ Հ. Մ. «Արարատ» կազմակերպութեան հիմնադրման 80-ամեակին նւիրւած միջոցառումները թէեւ մեկնարկելու են մայիսի 1-ից, սակայն մարտի 8-ը նպատակայարմար նկատւեց այս նախաձեռնութեան համար: Ծառատունկին, որին մասնակցում էին Հ.Մ.Ա.Կ.-ի տարբեր միութիւնների ներկայացուցիչները, ներկայ էր նաեւ Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը:
Արարողութեանը Հ. Մ. «Արարատ» կազմակերպութեան վարչութեան նախագահ Սոֆի Ջաղարբէգեանը ընդգծեց, որ այս քայլով գալիս ենք ապացուցելու, որ 80-ամեակը բոլորած կազմակերպութիւնը եռանդով ու նոր ծիլերով շարժւում է առաջ: Վերջում Սոֆի Ջաղարբէգեանի եւ Համլետ Խալոյեանի ձեռամբ նոր պուրակում տեղադրւեց յուշատախտակ, որի վրայ նշւած էր՝ նւիրւած Հայ մշակութային «Արարատ» կազմակերպութեան հիմնադրման ու գործունէութեան 80-ամեակին եւ «Արարատ» մարզաւանի կառուցման 50-ամեակին:
