Սպահանի հայոց թեմի Պատգամաւորական ժողովի նախաձեռնութեամբ, հինգշաբթի եւ ուրբաթ՝ մայիսի 2-ին եւ 3-ին, Նոր Ջուղայի Հայ Մ. Մ. «Արարատ» միութեան սրահում, տեղի ունեցաւ «Ազգային կեանք. մարտահրաւէրներ եւ առաջադրանքներ» խորագրով խորհրդաժողովը, մասնակցութեամբ թեմակալ առաջնորդ Տ. Սիփան արք. Քէչէճեանի, քահանայից դասի, Իսլ. Խորհրդարանում Սպահանի եւ հարաւային իրանահայութեան նորընտիր պատգամաւոր Գեղարդ Մանսուրեանի, ազգային մարմինների, շրջանի Հայ Դատի յանձնախմբի, միութիւնների ու հայոց ազգային դպրոցների Նոր Ջուղայի եւ Շահինշահրի ներկայացուցիչների ու ժողովրդի:
Խորհրդաժողովի բացումը տեղի ունեցաւ հինգշաբթի երեկոյեան ժամը 17:00-ին, Սպահանի հայոց թեմի առաջնորդ Սրբազան Հօր աղօթքով: Ապա Կազմակերպիչ յանձնախմբի անունից բացման խօսքով ելոյթ ունեցաւ Մանիա Ղուկասեանը: Նա նշելով, թէ անցնող 10-ամեակի ընթացքում ազգային-հասարակական կեանքի ոլորտների ընդարձակումն ու ծաւալը եւ ընթացիկ ծանր աշխատանքներն ու երկրի տնտեսական վիճակը, պատճառ են հանդիսացել, որ ազգային մարմինները հնարաւորութիւն չունենան հարկ եղած չափով զբաղւել երկարաժամկէտ ծրագրերով, աւելացրեց, թէ այդ նկատառումից ելնելով եւ ազգային մարմինների ուշադրութիւնը էական նշանակութիւն ունեցող այս ոլորտին սեւեռելու նպատակով, թեմի Պատգամաւորական ժողովը նախաձեռնել է կազմակերպել այս խորհրդաժողովը:
Երկօրեայ խորհրդաժողովն ընթացաւ երեք նիստերի ներքոյ, որոնց դիւաններն էին՝
Ա նիստ. Նախագահներ՝ Վրէժ Տէր-Մարտիրոսեան, Վաչիկ Հայրապետեան, քարտուղարներ՝ Ադրինէ Ղաւեան, Ռիմա Մարկոսեան
Բ նիստ. Նախագահներ՝ Աշոտ Դաւթեան, Ժորժ Ղազարեան, քարտուղար՝ Էմմա Օրդուբէգեան
Գ նիստ. Նախագահներ՝ Վրէժ Շիրւանեան, Սոնիկ Բաղումեան, քարտուղարներ՝ Մարիթա Քեշիշեան, Միգանուշ Տէր-Մարտիրոսեան
Ստորեւ ներկայացնում ենք արծարծւած թեմաները՝ պատկան զեկուցաբերներով.
ա. Կացութեան գնահատում՝ Նոէլ Մինասեան (Պատգամաւորական ժողով) եւ Թաթուլ Օհանեան
բ. Հոգեւոր կեանք
բ.1. Հեռանկար եւ մարտահրաւէրներ՝ Զաւէն Սիմոնեան (Կրօնական խորհուրդ) եւ Վարուժ Մովսիսեան
բ.2. Ենթաբաժիններ՝ Թովմա Գալստանեան
գ. Ազգային-հասարակական կեանք
գ.1. Հեռանկար եւ մարտահրաւէրներ՝ Վարուժ Մինասեան (Թեմական խորհուրդ)
գ.2. Ոլորտներ
Կրթական՝ Քառոլին Դիլանչեան
Բարեսիրական՝ Սկառլետ Հայրապետեան
Կալւածական՝ Նարբէ Ջարդն Դաւուդ
Մշակութային՝ Ռիմա Սիմոնեան
Մարզական՝ Մանիա Ղուկասեան (Նոր Ջուղայի Հայ Մ. Մ. «Արարատ» միութիւն)
Նշելի է, որ իւրաքանչիւր զեկոյցի աւարտին ներկաներն առիթ ունեցան իրենց առաջարկներն ու տեսակէտներն արտայայտելու պատկան թեմայի շրջագծում:
Խորհրդաժողովի աւարտին նախ Գեղարդ Մանսուրեանը կարեւորելով նման ժողովների կազմակերպումը ազգային կեանքի վերելքի եւ խոչընդոտների վերացման համար՝ մեծ նշանակութիւն տւեց յատկապէս զեկոյցներում արծարծւած մայրենի լեզւին լաւապէս տիրապետելու եւ երիտասարդներին ազգային կեանքում ներգրաււելու պարագաներին: Նա խոստացաւ, որ իր բոլոր ուժերով համագործակցելու է ազգային մարմինների հետ՝ թեմի համայնքների զարգացման եւ աշխուժացման ուղղութեամբ:
Պատգամաւորական ժողովի ատենապետ Նոէլ Մինասեանը բարձր գնահատելով ժողովին ներկայացւած զեկոյցները՝ շնորհակալական խօսք ուղղեց Կազմակերպիչ յանձնախմբին եւ նոյն յանձնախմբի հետ համագործակցութիւն ցուցաբերած միութիւններին ու անհատներին, զեկուցաբերներին, նիստերի դիւաններին եւ իհարկէ ունկնդրողներին: Նա աւելացրեց նաեւ, որ բոլոր զեկոյցներն օգտագործւելու են ազգային մարմինների աշխատանքների բարելաւման եւ առկայ խնդիրների ու դժւարութիւնների վերացման համար:
Տ. Սիփան արք. Քէչէճեանը գնահատելով կազմակերպւած ծրագիրը՝ անդրադարձաւ հոգեւոր դաստիարակութեանը եւ նշեց, թէ մարդ արարածը պէտք է ունենայ փայլուն միտք, առողջ մարմին եւ ազնիւ հոգի, իսկ ազնիւ հոգին որտեղի՞ց առաջ կը գայ, եթէ քրիստոնէական դաստիարակութիւն եւ բարոյագիտութիւն չստանանք, եկեղեցի չյաճախենք եւ աղօթքին չնւիրւենք: Սրբազան Հայրը աւելացրեց նաեւ, որ լսել է ժողովի ակնկալիքները հոգեւոր կեանքի կապակցութեամբ եւ փորձելու է եղած հնարաւորութիւններով իրականութիւն դարձնել դրանք, սակայն աշխատանքը հեզասահ չի լինելու, քանի որ նախ պէտք է իր զինւորների շարքը՝ քահանայից դասը համալրւի եւ արդէն երեք տարի է, ինչ Կրօնական խորհուրդը փորձում է զանազան յայտարարութիւններով քահանայ ձեռնադրւելու դիմումներ ստանալ, սակայն դժբախտաբար մինչեւ օրս որեւէ դիմում չի եղել:
Թղթակից (Նոր Ջուղա)
