ՀՀ Թաւրիզի հիւպատոսարանի ներկայացուցչի հրաժեշտի այցը Ատրպատականի առաջնորդ Սրբազանին
Ատրպատական, ազգային առաջնորդարան, Թաւրիզ – Կիրակի՝ յուլիսի 14-ի երեկոյեան ժամը 6:00-ին, Ատրպատականի հայոց թեմի առաջնորդ Տ. Գրիգոր արք. Չիֆթճեանը ընդունեց ՀՀ հիւպատոսութեան ներկայացուցիչ՝ Գրիգոր Մելքոնեանի այցելութիւնը:
Անցնող ամիսների ընթացքում, հովանաւորութեամբ Թեհրանում ՀՀ արտակարգ եւ լիազօր դեսպան՝ դոկտ. Արսէն Աւագեանի եւ դեսպանատան պատասխանատու անձնակազմին, Գրիգոր Մելքոնեանը գործուղւել էր Թաւրիզ, ՀՀ հիւպատոսարանի դասաւորման աշխատանքները իրականացնելու:
Աստծու օրհնութեամբ եւ ՀՀ-եան Թեհրանի դեսպանատան պատասխանատու անձնակազմի տնօրինումով, սոյն աշխատանքը իր աւարտին է հասել այժմ: Դրա գործնական աշխատանքները կատարող Գրիգոր Մելքոնեանը յատուկ այցելութեամբ, նախ բարի գալուստ մաղթեց առաջնորդ Սրբազան Հօրը, որը երեք ամիսներից ի վեր բացակայում էր թեմից, եւ ապա յայտնեց, որ Իրանի Իսլամական Հանրապետութիւնում իր աշխատանքը աւարտած լինելով, այլ երկիր է գործուղւում:
Սրբազան Հայրը իր օրհնութիւնն ու գնահատանքը արտայայտելով, նոր յաջողութիւններ մաղթեց Գրիգոր Մելքոնեանին: Այս առիթով կողմերը քննարկեցին նաեւ Հայաստանի Հանրապետութեան բարգաւաճման ծրագրերը, ինչպէս նաեւ Մայր Հայրենիքի նորանոր յաջողութիւնների համար որդեգրւած միջոցները:
