«ԱԼԻՔ», Կ. Դ. – Ապրիլի 24-ի միջոցառումներին մեր խուռներամ մասնակցութեամբ, մէկ անգամ եւս աշխարհին ապացուցենք, որ հայ ժողովուրդը համայն աշխարհում պահանջատէրն է իր բռնազաւթւած ու ոտնահարւած իրաւունքների: Հայ ժողովուրդը չի ուրանալու ոչ իր Սրբադասւած նահատակների արդար կանչը եւ ոչ էլ Հայոց Ցեղասպանութիւնը, քանզի Հայոց Ցեղասպանութիւնը լոկ պատմական փաստ չէ, եւ այսօր եւս շարունակւում է հայ ժողովրդի ցեղասպանութիւնը եւ բռնի տեղահանութիւնը,որի կասեցման համար անհրաժեշտ է աննահանջ պայքար:
Հաշւած օրեր են մնացել Հայոց Ցեղասպանութեան ոգեկոչման 110-րդ տարելիցին, եւ իր աշխատանքներն է շարունակում Թ. Հ. Թ. Թեմական խորհրդի կողմից կեանք կոչւած Հայոց Ցեղասպանութեան 110-րդ տարելիցը ոգեկոչող Կենտրոնական յանձնախումբը:
Երէկ, ապրիլի 5-ին, Կենտրոնական յանձնախմբի դիւանը եւ Թ. Հ. Թ. Թեմական խորհրդի ատենադպիր եւ յանձնախմբի կապ Հայրիկ Աղանեանը ազգային առաջնորդարանի դահլիճում հանդիպում ունեցան մարզամշակութային միութիւնների ներկայացուցիչների հետ:
Հանդիպման սկզբում, Կենտրոնական յանձնախմբի ատենապետ Ալեքս Կարապետեանը բացատրութիւններ ներկայացրեց յանձնախմբի կատարած աշխատանքների մասին, նշելով՝ քանի որ այս տարւայ կարգախօսն է՝ «Ուրանալով անցեալը, կը կորցնենք ապագան» ուստի կարեւորեց թօթափել անտարբերութեան ոգին եւ խուռներամ շարքերով մասնակցութիւնը Հայ ժողովրդի Սրբադասւած միլիոնաւոր Նահատակների արդար իրաւունքների հատուցման ու յարգանքի միջոցառումներին, ի մասնաւորի Ապրիլի 24-ի օրւայ ծրագրերին:
Նա նշեց, որ այս տարի Ապրիլի 23-ի երեկոյեան Թեհրանի Ս. Սարգիս առաջնորդանիստ եկեղեցու շրջափակում գտնւող Հայոց Ցեղասպանութեան նահատակների յուշարձանի մօտ միայն կատարւելու է մոմավառութիւն, իսկ Ապրիլի 24-ի առաւօտեան Նահատակների յիշատակին կատարւելու է եկեղեցական արարողութիւն, բարեխօսական աղօթք, ծաղիկներ են խոնարհւելու Սրբադասւած նահատակների յիշատակին, տեղի է ունենալու համահաւաք եւ այլ միջոցառումներ: Նա նշեց, որ նոյն օրը երեկոյեան ընկալեալ սովորութեան համաձայն «Արարատ» մարզաւանի «Սասունցի Դաւիթ» սրահում, Հայ Դատի յանձնախմբի՝ ՀՈՒՍԿ հաստատութեան նախաձեռնութեամբ իրականանալու է կենտրոնական գեղարւեստական-բանախօսական միջոցառում:
Յանձնախմբի ատենապետը միութիւնների ներկայացուցիչներին յորդորեց, որ իրենց միութենականներին դիմեն, որպէսզի բոլորը մասնակից դառնան յատկապէս Ապրիլի 24-ի օրւայ թէ՛ առաւօտեան, եւ թէ՛ երեկոյեան կազմակերպւող միջոցառումներին: Նա նշեց նաեւ որ եկեղեցու բակում տեղադրւած յուշարձանի թիկունքին ամրացւած պաստառը եւս համահունչ 110-ամեակի ոգուն եւ հայ ժողովրդի ներկայի կարգավիճակին արդէն ամրացւել է տեղում:
Հանդիպման ընթացքում Թեմական խորհրդի ատենադպիր եւ Կենտրոնական յանձնախմբի կապ Հայրիկ Աղանեանը ողջունեց միութիւնների ներկայացուցիչների մասնակցութիւնը կազմակերպւած հանդիպմանը եւ կարեւորեց յատկապէս նոր սերնդի ներկայութիւնը Ապրիլի 24-ի օրւան նւիւած բոլոր միջոցառումներին:
Ապա արտայայտւեցին միութիւնների ներկայացուցիչները ներկայացնելով իրենց տեսակէտները եւ առաջարկութիւնները:
