Թաւրիզի եկեղեցիների Խնամակալ մարմնի վարչութեան ընտրութիւնը
Ատրպատական, ազգային առաջնորդարան, Թաւրիզ – Թեմական խորհրդի ընտրութիւնից յետոյ, Ազգային իշխանութեան հովանու ներքոյ գործող բոլոր կառոյցները իրենց ներքին ընտրութիւնները կատարելու աշխատանքին լծւեցին, բարձր հովանաւորութեամբ թեմի առաջնորդ՝ Տ. Գրիգոր արք. Չիֆթճեանի:
Սոյն կառոյցների կարեւորագոյններից է Թաւրիզի եկեղեցիների Խնամակալ մարմինը, որի խնամքին են յանձնւել բոլոր եկեղեցիները Թաւրիզում, սկսեալ Ս. Աստւածածին Մայր եկեղեցուց (Ղալայում), Ս. Սարգիս եկեղեցին (Լիլաւայում), Սբ. Աստւածածին մատուռը (Մարալանում) եւ Ս. Շողակաթ եկեղեցին (Էմամիէում): Մեր վանքերում եւս, ուխտագնացութեան օրերին Խնամակալ մարմինը յատուկ պաշտօն է ստանձնում, մոմի եւ յուշանւէրների վաճառքի:
Ժողովական նիստին ներկայ էին անդամուհիները, Թեմական խորհրդի ներկայացուցիչներ Վարդան Կարապետեանը եւ Քաթրին Դիլանեանը: Բարի գալստեան եւ օրհնութեան խօսքով, առաջնորդ Սրբազանը ողջունեց ներկաներին, լայնօրէն անդրադառնալով այն ծառայասիրութեան, որով բնորոշւում է վերոյիշեալ կառոյցի առաքելութիւնը:
Սրբազանը իր բարձր գնահատանքը յայտնեց շրջանաւարտ վարչութեան եւ յատկապէս ատենապետուհի Էմմա Յարութիւնեանին, որը յատուկ զոհողութիւններով աւարտին էր հասցրել իր ծառայութիւնը, սոյն Մարմնի աշխատանքներում յաջողութիւններ արձանագրելով:
Առաջնորդ Սրբազանը բարի աշխատանք մաղթեց ընդհանուր ժողովին, եւ Աստծուց խնդրեց վարձահատոյց լինել եկեղեցու ծառայող բոլոր կանանց: Ապա ընտրւեց ընտրական դիւանը, Անահիտ Յակոբեանից, Լուսիկ Ոսկանեանից եւ Արմինէ Արզումանեանից բաղկացած:
Ժամանակաւոր դիւանի առաջնորդութեամբ, շրջանաւարտ վարչութիւնը ներկայացրեց իր բարոյական եւ նիւթական զեկոյցները, որը ներկաներին մատուցեց ատենապետուհի Էմմա Յարութիւնեանը: Նկատի ունենալով աշխարհում տիրած համաճարակի ժամանակահատւածը, ժողովականութիւնը բարձր գնահատանք ներկայացրեց աշխատող կազմին, երբ ամենադժւարին օրերին իսկ անպակաս էր եղել Խնամակալի ներկայութիւնը եկեղեցում, ծառայական առաքելութեամբ:
Գաղտնի քւէրակութեամբ նորընտիր կազմ յայտարարւեցին երեք անձեր՝ Անահիտ Յակոբեանը՝ ատենապետուհի, Ռեբեքա Սարգիսեանը՝ քարտուղարուհի եւ գոյքապահ եւ Արմինէ Արզումանեանը՝ հաշւապահուհի: Անձնափոխանորդներ ընտրւեցին Էլենա Օրդուխանեանը եւ Մանուշ Կարապետեանը:
Այնուհետեւ դիւանի նախաձեռնութեամբ նշանակւեցին անդամական շարքերից չորս հոգանոց չորս խմբեր, որոնք յանձն առին եկեղեցիների բարեզարդման աշխատանքները:
Ժողովի փակման խօսքը արտասանեց առաջնորդ Սրբազանը: Նա հակիրճ բացատրութիւն տւեց վարչական կառոյցները հովանաւորող Թեմական խորհրդի բարձր պատասխանատւութեան մասին, որի հրահանգներին եւ հսկողութեան ենթակայ են բոլոր Ազգային կառոյցները եւ միութենական աշխատանքները:
Սրբազանը յայտնեց, որ վերջին տասնամեակներին մեծապէս նւազել է թիւը այն անձանց, ովքեր ծանօթ են Թեմական իշխանութեան գործունէական ուղղութիւն եւ հեղինակութիւն տւող Կանոնագրութեան, որի թւագրեալ տասնեակներով յօդւածները կարգաւորում են Թեմի բոլոր կառոյցների կեանքը: Վերջապէս, Սրբազանը բարի առաքելութիւն մաղթեց նորընտիր մարմնին, եւ լիառատ յաջողութիւն Կանանց Խնամակալ մարմնի բոլոր անդամներին:
