Ազգային առաջնորդարանի Հանրային Կապից տեղեկանում ենք, որ հինգշաբթի՝ նոյեմբերի 12-ին, Նոր Բուրաստան գերեզմանատանը տեղի ունեցաւ Թեհրանի հայոց թեմի երախտաւոր բարերար Սանդուխտ Միրզախանեանի յուղարկաւորութեան արարողութիւնը, որին ներկայ էին Թեմական խորհրդի ատենապետ Վահէ Թարոյեանը, կառոյցիս ներկայացուցիչները, Թ. Հ. Կանանց Բարեգործական Ընկերութեան վարչութեան ու «Սօսէ Մայրիկ» հանգստեան տան ներկայացուցիչները եւ հանգուցեալի հարազատները։ Յուղարկաւորութեան կարգը կատարեց Տէր Յակոբ քհնյ. Քեշիշեանը։
Այս առիթով Թ. Հ. Թ. Թեմական խորհրդի կողմից ընթերցւած դամբանականում մասնաւորապէս նշւած է.
«Այսօր, խոր վշտով ու յարգանքով, հրաժեշտ ենք տալիս հանգուցեալ Սանդուխտ Միրզախանեանին՝ մի անձնաւորութեան, որի կեանքի ուղին եւ կատարած բարերարութիւնը արժանի են մեր խորին գնահատանքին ու երախտագիտութեան։
Իւրաքանչիւր մարդու կեանքի արժէքը չափւում է ոչ միայն նրա ապրած տարիներով, այլեւ այն բարիքով, այն հետքով ու այն ժառանգութեամբ, որ նա թողնում է իրենից յետոյ: Տիկին Սանդուխտ Միրզախանեանը, իր ունեցւածքը Ազգային Առաջնորդարանին նւիրաբերելով, թողել է մի ժառանգութիւն, որն իր նիւթական արժէքից այնկողմ ունի ազգային, բարոյական եւ հոգեւոր նշանակութիւն։
Նրա այս քայլը վկայում է, որ նա իր ունեցւածքը դիտել է ոչ միայն որպէս անձնական սեփականութիւն, այլեւ որպէս միջոց՝ ծառայելու իր համայնքին, իր ազգային կառոյցին եւ ապագայ սերունդներին։ Սա վստահութեան, նւիրումի եւ ազգային գիտակցութեան արտայայտութիւն է, որը յատկապէս արժեւորւում է այսօր՝ նրա վերջին հրաժեշտի պահին։
Ազգային կառոյցները գոյատեւում եւ ամրապնդւում են ոչ միայն իրենց առօրեայ աշխատանքով, այլեւ այն մարդկանց շնորհիւ, ովքեր իրենց կեանքի ընթացքում եւ անգամ իրենց մահւանից յետոյ մտածում են այդ կառոյցների յարատեւութեան ու ապագայի մասին։ Տիկին Սանդուխտ Միրզախանեանի բարերարութիւնը հէնց այդպիսի օրինակ է՝ օրինակ, որը յիշեցնում է մեզ, որ ազգային նւիրումը կարող է դառնալ մնայուն ժառանգութիւն եւ ծառայել սերունդների։
Նրա կտակը մեզ համար ոչ միայն երախտագիտութեան առիթ է, այլեւ պատգամ։ Պատգամ՝ մեր համայնքի իւրաքանչիւր անդամին, որ ազգային կառոյցների հանդէպ հոգածութիւնը, դրանց ապագայի նկատմամբ պատասխանատւութիւնը եւ սեփական կարողութիւնների ներդրումը մեր ազգային կեանքի գոյատեւման եւ անխափան ընթացքի կարեւոր երաշխիքներից են։
Թեհրանի Հայոց Թեմի Թեմական Խորհուրդը, խորապէս գնահատելով հանգուցեալ Սանդուխտ Միրզախանեանի ազգանւէր բարերարութիւնը, իր երախտագիտութիւնն ու յարգանքն է յայտնում նրա յիշատակին։ Նրա կատարած նւիրաբերութիւնը կը մնայ մեր ազգային կեանքի պատմութեան մէջ՝ որպէս վեհանձնութեան, վստահութեան եւ պատասխանատւութեան արժանի օրինակ։
Թող նրա թողած ժառանգութիւնը շարունակի բարիք պարգեւել մեր համայնքին, իսկ նրա ազգանւէր օրինակը ներշնչանքի աղբիւր դառնայ բոլորիս համար՝ մեր ազգային կառոյցների հանդէպ առաւել նւիրումով ու պատասխանատւութեամբ ծառայելու գործում:
Յաւերժ յիշատակ եւ խոնարհում նրա յիշատակին»։
