«ԱԼԻՔ» – Տօների տօն Մայիսի 28-ի 108-ամեակի առիթով Հ. Մ. Մ. «Նայիրի» միութեան կենտրոնատեղի «Սուքերեան» սրահում նախաձեռնութեամբ միութեան Արւեստից բաժանմունքի յունիսի 19-ի երեկոյեան կազմակերպւել էր գեղարւեստական յայտագրով յագեցած միջոցառում «Դէպի Սարդարապատ» խորագրով։
Տէրունական աղօթքով եւ Հայաստանի Հանրապետութեան ու Արցախի օրհներգերով մեկնարկած միջոցառմանը մէկը միւսին յաջորդող հաղորդավար-պատմիչները համապրփակ գծերով ներկայացնելով հայ ժողովրդի պատմական տւեալները կենտրոնացան Հայոց Ցեղասպանութեան արհաւիրքից վերածնւած եւ Մայիսեան յաղթանակով պսակւած հայ ժողովրդի հերոսական պատմութեանը:
Հերմինէ Օրուջեանը, Գամեր Աբնուսեանը եւ Մարթին Աղանեանսը, մերթ ընդ մերթ բեմայարթակի վրայ ներկայացրեցին հայ ժողովրդի պատմական ու հերոսական դրւագները: «Այսօր մենք հաւաքւել ենք ոչ միայն մի ամսեթիւ նշելու համար, այլ մի ամբողջ պատմութիւն յիշելու, հասկանալու եւ նորից ապրելու համար: Մայիսի 28-ը հայ ժողովրդի պատմութեան մէջ պարզապէս օրացուցային ամսեթիւ չէ: Դա մի հսկայ ճանապարհի հանգրւան է, մի ժողովրդի կամքի, ցաւի, պայքարի, դիմադրութեան եւ վերածննդի խորհրդանիշ»,- այս տողերով մեկնարկեց միջոցառումը, որի շարունակութեան մէջ հաղորդավարները անդրադարձան Մայիսեան յաղթանակի անժխտելի կարեւորութեանը ներկայի ազատ ու անկախ Հայաստանի Հանրապետութեան գոյութեան առումով, ընդգծելով որ երբ հայ ժողովուրդը տոգորւեց Մայիսեան ոգով եւ համախմբւածութեամբ, թօթափեց օտարների լուծը, որի վկան ազատ ու անկախ Արցախի կերտումն էր, որը ժամանակաւորապէս խլւել է հայ ժողովրդից:
Միջոցառումը զուգորդւած էր մեներգերով եւ միութեան «Նայիրի» պարախմբի սաների կատարմամբ, որոնք ներկայացւող պատմական իրականութիւններին համահունչ հանդէս էին գալիս կատարումներով: Ազգային-յեղափոխական մեներգերով ելոյթ ունեցան Ժիլբերտ Կարապետեանը եւ Էրիկա Դաւթեանը: Ազգագրական պարերով ելոյթ ունեցած Հ. Մ. Մ. «Նայիրի» միութեան «Նայիրի» պարախմբի պարուսոյցն է Թինա Անտոնը:
Գեղարւեստական յայտագիրը հիմնականում բաղկացած էր երկու բաժիններից, որի երկրորդ բաժնում հէնց նոյն հաղորդավարներ-պատմիչները հանդէս եկան թատերական կատարմամբ, բեմադրիչ Անի Զաքարեանի:
Բովանդակալից թատերական ներկայացման միջոցով հանդիսատեսին փոխանցւեց հետեւեալը, որ իւրաքանչիւրս ուսումնասիրելով մեր ժողովրդի պատմութիւնը, պարտականութիւն ունենք մեր միջավայրում փոխանցել հայ ժողովրդի պատմութիւնը մեր շրջապատին, որպէսզի բոլորը նոյնիսկ ոչ հայ հասարակութիւնը ծանօթանայ հայ ժողովրդի պատմական հարուստ մշակոյթին ու պատմութեանը: Ներկայացման աւարտին երբ դերակատարները ողջունեցին մայիսեան յաղթանակը հնչեց «Սարդարապատ» քայլերեգը, եւ դահլիճը ոտընկայս ձայնակցեց:
Վերջում բեմայարթակ հրաւիրւեց Տ. Արիստակէս քհնյ. Շահմիրեանը փոխանցելու Թ. Հ. Թ. առաջնորդ Տ. Սեպուհ արք. Սարգսեանի պատգամը Մայիսի 28-ի առիթով: Պատգամի մէջ նշւած էր. «Մայիսի 28-ի խորհուրդը իր մէջ ունի պատգամ, որ մեր ամենօրեայ կեանքի հետ շաղախւած իրականութիւն պիտի լինի: Մայիսի 28-ը մեզ պատգամում է հետեւեալը՝ Ազատութիւնը պահպանւում է ոչ միայն յաղթանակներով, այլ նաեւ ամէն օր հայրենիքի հանդէպ պատասխանատւութեամբ: Պատասխանատւութիւն, որի միջոցով կենրտելու ենք նոր յաղթանակներ, նոր ձեռքբերումներ ի շահ մեր երկրի, եւ մեր ժողովրդի արժանավայել կեանքի»:
Ապա բեմ հրաւիրւեց միութեան վարչութեան նախագահ Ֆրէդ Աշուղեանը, ով իր գնահատական խօսքերը ուղղելով ներկաներին եւ ծրագիրը կազմակերպող ու ծրագրին իրենց դերակատարութիւնը բերած անհատներին ընդգծեց, որ ոչ ոք չի կարող հայի հոգուց հանել ու ջնջել մեր ազգային արժէքներ համարւող Արարատ բիբլիական լեռան գաղափարը, ոչ ոք չի կարող օտարացնել մեր հայրենի տարածքները, ինչպէս Արցախը, որը ժամանակաւորապէս բռնագրաււած է, եւ ինչպէս որ արիւնից,ցաւից ու վշտից վերածնւեց 1918 թւականին Հայաստանի Հանրապետութիւնը, կրկին հայ ժողովուրդը նւաճելու է իր արժանապատւութիւնը տէրը կանգնելով իր ազգային արժէքների:
Միջոցառմանը ներկայ էին Թ. Հ. Թ. Պատգամաւորական ժողովի եւ Թեմական խորհրդի ատենադպիրներ՝ Արփի Ալավերդեանը եւ Հայրիկ Աղանեանը, քահանայ հայրեր, ազգային մարմինների եւ միութիւնների ներկայացուցիչներ եւ մեծ թւով հայրենակիցներ:
Թղթակցութիւնը՝ ԿԱՐԻՆԷ ԴԱՒԹԵԱՆԻ
