Տեղի ունեցաւ «Բացայայտի՛ր Նոր Ջուղան՝ նրա պատմութիւնը, գաղտնիքներն ու ժառանգութիւնը» խորագրով ջուղայագիտութեան երիտասարդական ամառային նիստերը, որոնք նախատեսւած էին 15-ից 45 տարեկանների համար, մեծ հետաքրքրութիւն ստեղծելով ունկնդիրների մօտ եւ յաջողութեամբ աւարտւեցին Օգոստոս 27-ին։
Ծրագրի նպատակն էր երիտասարդներին աւելի խորը ծանօթացնել Նոր Ջուղայի պատմութեան, մշակոյթի, արւեստի, հոգեւոր ժառանգութեան եւ աշխարհում ունեցած նշանակութեան հետ՝ փորձառու մասնագէտների եւ դասախօսների մասնակցութեամբ։
Դասընթացների ընթացքում ներկայացւեցին երեք հիմնական թեմատիկ ուղղութիւններ։
Ա նիստին անդրադարձ կատարւեց 16–17-րդ դարերի աշխարհաքաղաքական իրավիճակին, Շահ Աբբասի քաղաքականութեան եւ հայերի գաղթին դէպի Իրան։ Թեման ներկայացրեց Սեֆեւեան շրջանի պատմաբան դոկտ. Քամռանիֆառը։
Բ նիստին մասնակիցները ծանօթացան խոջաների պատմութեանը, Նոր Ջուղայի հիմնադրմանը, նրա թաղամասերին եւ եկեղեցիներին։ Նիւթերը ներկայացրին Նոր Ջուղայի զբօաշրջութեան ուղեվարներ Արգին Աբնուսեանն ու Նորայր Կարապետեանը։
Գ նիստը նւիրւած էր Նոր Ջուղայի արհեստին եւ արւեստին։ Մասնակիցները լսեցին դասախօսութիւններ Սուրբ Ամենափրկիչ Վանքի արխիւի եւ ձեռագիր մատեանների, Նոր Ջուղայի մանրանկարչական արւեստի, որմնանկարչութեան, ինչպէս նաեւ Նոր Ջուղայի վաճառականների կողմից 17–18-րդ դարերին իրականացւած թանկարժէք քարերի համաշխարհային առեւտրի վերաբերեալ։
Այս թեմաներով հանդէս եկան Անի Բաբայեանը՝ Բոստոնից, Գրետա Գասպարեանը՝ Երեւանից, դոկտ. Վաչիկ Հայրապետեանը եւ Թովմա Գալստանեանը՝ Նոր Ջուղայից։
Դասընթացների նիւթերը մասնակիցներին ներկայացւեցին գեղեցիկ եւ բովանդակալից սլայդներով ու տեսանիւթերով, որը դասախօսութիւնները դարձրեց առաւել հետաքրքրական, պատկերաւոր եւ մատչելի։
Դասընթացների աւարտին՝ Օգոստոսի 27-ին, մասնակիցների համար կազմակերպւեց Նոր Ջուղայի շրջագայութիւն, որի ընթացքին նրանք հնարաւորութիւն ունեցան տեղում մանրամասնօրէն ծանօթանալու Նոր Ջուղայի հոգեւոր եւ մշակութային ժառանգութեանը։ Շրջագայութեան ընթացքին երիտասարդները այցելեցին Սուրբ Բեթղեհէմ եկեղեցի, Սուրբ Ամենափրկիչ Վանքի Սուրբ Յովսէփ Արիմաթացի եկեղեցի եւ «Խաչատուր Կեսարացի» ու Նոր Ջուղայի հայոց ազգագրական թանգարաններ, Կուսանաց Վանք, ինչպէս նաեւ ծանօթացան Երաժշտական թանգարանի պատմութեանը։
Ջուղայագիտութեան երիտասարդական ամառային նիստերը դարձան Նոր Ջուղայի պատմութեան եւ մշակութային ժառանգութեան ճանաչման կարեւոր նախաձեռնութիւն՝ երիտասարդների շրջանակում ազգային ինքնագիտակցութեան, համայնքային պատմութեան եւ մշակութային ժառանգութեան պահպանման նկատմամբ հետաքրքրութիւն խթանելու ուղղութեամբ։
Ծրագիրը իրականացւեց Սպահանի հայոց թեմի Թեմական Խորհրդի հովանաւորութեամբ եւ Նոր Ջուղայի զբօսաշրջութեան գրասենեակի նախաձեռնութեամբ։ Ծրագրի կազմակերպման գործում իրենց ներդրումն ունեցան՝ Վերգինէ Միրզախանեանը, Կարին Տէր Մարտիրոսեանը, Նորայր Կարապետեանը, Արգին Աբնուսեանը, Նարէ Մարկոսեանը, Վանանդ Իսաղուլեանը եւ Ադրիան Մկրտչեանը:
Ծրագրի կազմակերպիչները, ամփոփելով ծրագիրը, արձանագրեցին, որ դասընթացները անցան ջերմ եւ արդիւնաւէտ մթնոլորտի մէջ։ Սոյն նիստերի յաջող աւարտը նոր քայլ է՝ Նոր Ջուղայի արժէքը նոր սերնդին փոխանցելու եւ նրանց միջոցով այն աշխարհին ներկայացնելու ճանապարհին։
ՍՊԱՀԱՆԻ ՀԱՅՈՑ ԹԵՄԻ ԱԶԳԱՅԻՆ ԱՌԱՋՆՈՐԴԱՐԱՆԻ ՀԱՆՐԱՅԻՆ ԿԱՊ
