Ամանորի դիմաւորում Թաւրիզի Հայ համալսարանականների միութեան յարկի տակ
Ատրպատական, ազգային առաջնորդարան, Թաւրիզ – Դեկտեմբերի 21-ի առաւօտեան ժամը 11:00-ին, Թաւրիզի Հայ համալսարանականների միութեան կենտրոնատեղիում տեղի ունեցաւ Ամանորի դիմաւորում:
Վարչութիւնը այս ծրագիրը կազմել էր, միութեան յարկի տակ զւարճացնելու իր կազմակերպած դասարաններին մասնակցող երեխաներին: Համալսարանական ուսանողների դասատւութեամբ, թաւրիզահայ մի խումբ երեխաներ հետեւում են շախմատի եւ նկարչութեան դասերի:
Վարչութեան հրաւէրով, Ամանորի սոյն ներքին՝ մտերմիկ ծրագրին ներկայ էին՝ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, քաջալերելու համար միութեան գործունէութիւնը: Սրբազան Հօրը ընկերակցում էր Թաւրիզի հոգեւոր հովիւ՝ Տ. Մարտիրոս քհնյ. Ղուկասեանը, ինչպէս նաեւ Թեմական խորհրդի անդամ՝ Քաթրին Դիլանեանը:
Բարի գալստեան եւ Ամանորի շնորհաւորանքի խօսք փոխանցեց վարչութեան ատենապետ Վարդան Ենովքեանը: Ապա, Սրբազան Հայրը երեխաներին ուղղւած հայրական խօսքով իր ուրախութիւնը յայտնեց, որ ուսումնական տարւայ ամէն շաբաթավերջերին, իրենց ծնողների առաջնորդութեամբ գալիս են Համալսարանական միութեան կենտրոնատեղին, եւ հետեւում մատուցւած նիւթերին:
Սրբազան Հայրը անդրադառնալով անցած տարւայ ազգային եւ միջազգային դժւարութիւններին, մաղթեց, որ առաջիկայ 2024 թւականը համայն աշխարհի եւ ի մասնաւորի՝ մեր ազգի համար լինի խաղաղութեան ու անվտանգութեան տարի:
Պաշտօնական խօսքերից յետոյ եւ հիւրասիրութեան պահին ժամանեց տարւայ սպասւած հիւրը՝ Ձմեռ պապին, որը ուրախացրեց բոլոր ներկաներին իր հետ բերած նւէրներով:
Ձմեռ պապիի ներկայութեամբ հատւեց նաեւ Ամանորի տորթը, որով նաեւ հիւրասիրւեցին բոլոր ներկաները, նոր տարւայ շնորհաւորանք եւ բարեմաղթութիւններ փոխանակելով:
