Յիշատակի միջոցառում՝ նւիրւած «Նեմեսիս» գործողութեան 104-ամեակին
«ԱԼԻՔ» – ՀՅԴ ՀԵՄ-ի եւ ՀՅԴ Աջափնեակի կոմիտէի նախաձեռնութեամբ մարտի 15-ին Աջափնեակ համայնքում գտնւող Սողոմոն Թեհլիրեանի կիսանդրու մօտ տեղի ունեցաւ յիշատկի միջոցառում՝ նւիրւած «Նեմեսիս» գործողութեան 104-ամեակին:
Միջոցառմանը ներկայ արցախեան պատերազմի մասնակից, «Ֆիդայիներ» կազմակերպութեան նախագահ Սէյրան Չիլինգարեանը լրագրողների հետ զրոյցում ասաց. «Այն ինչ յայտարարւում է կիսատ է։ Մենք փաստացի այսօր չունենք Արցախ, փոխարէնն ունենք վտանգւած սահմաններ, ունենք բարձունքներ, որ գտնւում է թշնամու տիրապետութեան տակ»:
Ռեժիսոր Սամուէլ Թադէոսեանը նշեց, որ ներկայ իշխանութիւնն ամէն ինչ անում է, որ մենք մոռանանք մեր հերոսներին, բայց անկախ այդ ամէնից մենք այս նշանաւոր օրն այստեղ ենք:
ՀՅԴ Հայաստանի ԳՄ անդամ, ԱԺ «Հայաստան» խմբակցութեան պատգամաւոր Գեղամ Մանուկեանը կարեւորելով օրւայ խորհուրդը, ասաց․ «Հիմա շատ աւելի խորհրդանշական են այս հաւաքները, նրանով են խորհրդանշական, քանի որ վերջին տարիներին մեզանից, հայութիւնից գողացան պատիւը, արժանապատւութիւնը, մեր մէջքը ծռւած է»:
