«ԱԼԻՔ» – ՄԱԿ-ի ԱԽ-ում ունեցած ելոյթում, Իրանի ԱԳ նախարար Հոսէյն Ամիր Աբդօլլահեանն ասել է. «Իսրայէլի վրայ պէտք է ճնշում գործադրել Իրանի դէմ ռազմական գործողութեան կրկնութիւնը կանխելու համար»։
Նա նշել է. «Իրանի դէմ Իսրայէլի ռեժիմի կողմից ուժի կիրառման եւ ագրեսիայի դէպքում, Թեհրանը կը տայ կոշտ պատասխան եւ ռեժիմին կը ստիպի ափսոսալ իր գործողութիւնների համար»։
Ամիր Աբդօլլահեանն ասել է․ «Ապրիլի 1-ին Դամասկոսում Իրանի հիւպատոսարանի վրայ Իսրայէլի յարձակումը ցոյց տւեց, որ ռեժիմը չի վարանում խախտել անգամ դիւանագիտական անձանց եւ վայրերի անձեռնմխելիութեան մասին Վիեննայի կոնւենցիան»։
Parstoday-ի համաձայն, քննադատելով Իսրայելի յարձակման նկատմամբ ՄԱԿ-ի եւ ԱԽ-ի անգործութիւնն Ամիր Աբդօլլահեանը յաւելել է, որ ԱՄՆ-ի, Բրիտանիայի եւ Ֆրանսիայի անպատասխանատու քայլերի պատճառով, Անվտանգութեան խորհուրդը չկարողացաւ այս անօրինական յարձակումը դատապարտող յայտարարութիւն ընդունել։
Նշելով, որ Իրանը միշտ դրական դերակատարութիւն է ունեցել տարածաշրջանային զարգացումներում, այդ թւում՝ կայուն խաղաղութեան եւ անվտանգութեան հաստատման հարցում, ինչպէս նաեւ ահաբեկչութեան դէմ պայքարում, Աբդօլլահեանը յաւելել է. «Պահապանների կորպուսը կարեւոր դերակատարութիւն ունի ահաբեկչութեան դէմ պայքարում, եւ դրա ապացոյցն է ԻՅՊԿ «Ղոդս» ստորաբաժանման նախկին հրամանատար, գեներալ-լէյտենանտ Ղասեմ Սոլէյմանիի եւ նրա ուղեկիցների սպանութիւնը Բաղդադում»։
Իր ելոյթի ընթացքում Ամիր Աբդօլլահեանը նշել է. «Որեւէ պետութիւն, շեշտում եմ՝ որեւէ պետութիւն չէր լռելու իր երկրի իշխանութեան խորհրդանիշը համարւող դեսպանատան վրայ, նման լուրջ եւ անբարիր հրթիռային յարձակման դիմաց, որի հետեւանքով սպանւէին իր պաշտօնական ու դիւանագիտական առաքելութիւն վարող անձինք»: Նա ընդգծեց. «Շեշտում եմ, որ այժմ աւարտւել է Իրանի օրինաւոր պաշտպանութեան եւ փոխադարձ ու համապատասխան քայլը, ուստի Իսրայելի ռեժիմին պէտք է ստիպել որ Իրանի շահերի դէմ առաւել ռազմական արկածախնդրութիւն չկրկնի: Անտարակոյս եթէ Իսրայէլի ռեժիմը, Իրանի շահերի դէմ ուժ բանեցնի կամ ներխուժում իրականացնի, Իրանի Իսլամական Հանրապետութիւնը եւս, անմիջապէս պատասխանելու իր բնածին իրաւունքների գծով, անկասկած վճռակամ, կտրուկ եւ փոշմանեցնող պատասխան է տալու: Այս որոշումը անփոփոխ է»:
