Վահրամ Բալայեան. «Երբ 2020 թւականին յանձնւեց Շուշին, կանխորոշւեց պատերազմի ելքը»
«ԱԼԻՔ» – «Թէեւ մենք վերջին պատերազմում պարտւեցինք, անյաջողութիւն ու մեծ կորուստներ ունեցանք, այդ հերոսների կատարածը չի խունանում։ Այս մասին երէկ՝ մայիսի 9-ին, Եռաբլուրում լրագրողների հետ զրոյցում նշել է Արցախի ԱԺ փոխնախագահ, ՀՅԴ Արցախի ԿԿ անդամ Վահրամ Բալայեանը։
«Այսօր էլ մենք պէտք է երկրպագենք այդ մեր հերոսներին եւ ընդհանրապէս սերունդների համար դաստիարակչական օրինակ պէտք է հանդիսանայ։ Մենք կարող ենք գլուխներս բարձր պահել, որովհետեւ այդ մարդիկ ապրեցին անանձնական կեանքով, ապրեցին յանուն երկրի, յանուն պետականութեան, յանուն հայութեան»,-ասել է նա։
«Անհնարին էր չազատագրել Շուշին եւ ունենալ հայկական Արցախ։ Դա կեանքն էլ ապացուցեց եւ վերջին զարգացումներն էլ ապացուցեցին, որ երբ 2020 թւականին յանձնւեց Շուշին, փաստօրէն, ինչ-որ մի տեղ կանխորոշւեց նաեւ պատերազմի հետագայ ելքը։ Ես նկատի ունեմ 2023 թւականի իրադարձութիւնները։ Մենք Շուշիի կորուստով բացեցինք մեր անյաջողութիւնների դուռը»,- նշել է նա։
Հարցին՝ ինչպիսի՞ պայմաններ պէտք է ստեղծւեն, որպէսզի հնարաւոր լինի Շուշիի վերաազատագրումը, Բալայեանը պատասխանել է. «Ամենամեծ գրաւականը պէտք է լինի մեր համազգային միասնականութիւնը։ Սա անչափ կարեւոր է։ Այսօր անընդհատ մեր ժողովրդին դրսից ներարկւում է սեւեր-սպիտակներ, հներ-նորեր, արցախցիներ-հայաստանցիներ թեմաները։ Մեր ժողովրդին կարելի է միայն ու միայն յաղթել այդ բաժանումների միջոցով։
Պէտք է ամենախիստ պատիժների ենթարկել այն մարդկանց, որոնք խաթարում են այդ միասնականութեանը։ Ես երբեմն նայում եմ հեռուստատեսութիւն, նոյնիսկ պատասխանատու մարդիկ են այդպիսի բաժանարար գծեր դնում, սա վտանգաւոր է»։
