Վադիմ Արութիւնով. «Փաշինեանը բացառապէս թուրքական նարատիւներ է հնչեցնում»

AlphaNews-ի հետ զրոյցում յայտնի հայ լրագրող, բլոգեր եւ արեւելագէտ Վադիմ Արութիւնովը մեկնաբանել է ՀՀ գործող իշխանութիւնների հակահայկական թեզերը եւ ընդգծել, որ նրանք բառ առ բառ կրկնում են թուրքական նարատիւները։

«Ի սկզբանէ, երբ այս մարդիկ եկան Հայաստանում իշխանութեան, ես համաձայն չէի, որ նրանք ընդհանրապէս գոյութիւն ունենան, քանի որ երբեք չեմ վստահել նրանց, ի սկզբանէ դէմ էի։ Իսկ երբ ասում են, որ ներկայիս արտգործնախարարն (Արարատ Միրզոյեան) ունի ամենաբարձր IQ կառավարութիւնում, ես պատկերացնում եմ, թէ միւսներն ինչ ունեն»,- նշել է Արութիւնովը։

Ըստ նրա` Հայաստանի ներկայիս իշխանութիւնները կրկնում են այն, ինչ թուրքական իշխանութիւնները տասնամեակներ շարունակ սերմանել են իրենց երկրում.

«Ինչ վերաբերում է Փաշինեանին, նա ամբողջութեամբ վերապատմում է այն, ինչի մասին խօսւել է Թուրքիայում այս տարիների ընթացքում։ 2016 թւականին ես այցելեցի Թուրքիա՝ պոլսահայերի կեանքի մասին պատմութիւններ պատրաստելու։ Ես մի փոքրիկ բնակարան վարձեցի Ստամբուլի կենտրոնում եւ ուզում էի զրուցել հին թուրքերի հետ եւ պարզել, թէ ինչպիսին են նրանք։ Ես հանդիպեցի որոշ մարդկանց, բայց նրանք չգիտէին, որ ես հայ եմ, քանի որ ես ներկայացայ որպէս ռուս։ Ես նրանց ասացի, որ ապրիլի 24-ին Ռուսաստանում բոլոր հայերը յիշում են ողբերգական իրադարձութիըններն ու Ցեղասպանութիւնը։

Գլուխները խոնարհեցին, բայց մէկը քաջութիւն հաւաքեց եւ ասաց, որ այդ հայերին չի գտել, թէեւ նրանց սերունդները դեռ այստեղ են ապրում։ Եւ պէտք չէ հաւատալ հայերի եւ ռուսների բոլոր խօսակցութիւններին Ցեղասպանութեան մասին, այստեղ ցեղասպանութիւն չի եղել։ Եղաւ առաջին համաշխարհային պատերազմը, եւ հայերը չափազանց շատ էին վստահում ռուսներին, եւ պարզւեց, որ նրանք յայտնւեցին ռուսների եւ թուրքերի միջեւ։

Որպէս ապացոյց, որ թուրքերը միշտ լաւ են վերաբերւել հայերին, նա բերեց Ստամբուլի հայ ճարտարապետների մասին թուրքերէն ալբոմ, որը հրատարակւել է 2011 թւականին։ Ապա յաւելեց, որ բոլոր հարցերը պէտք է ուղղել ռուսներին, ոչ թէ իրենց։ Պատմական հարցերի շուրջ թուրքը յաւելեց, որ այստեղ Հայաստան չկար, իսկ քրդերն այնտեղ միշտ ապրել են հայերի հետ միասին։ Իսկ հիմա սա Փաշինեանից եմ լսում բառ առ բառ։ Այս բոլոր խօսքերը, որ ես լսում եմ, տարակուսանք են առաջացնում, նրա բոլոր թուրքական թեզերը, թէ Հայաստանը Հայաստան չէ, որ զինանշանը պէտք է փոխւի, որ Ցեղասպանութիւն չի եղել, եւ որ ամէն ինչում ռուսներն են մեղաւոր եւ այլն»,- ընդգծել է Արութիւնովը։