Դաւիթ Իշխանեանը հաստատել է, որ եղել է ՀՅԴ ակտիւ անդամ եւ մասնակցել է Արցախեան ազատամարտին

«ԱԼԻՔ» – Ապրիլի 4-ին շարունակւել է Բաքւում ապօրինի պահւող Արցախի ռազմա-քաղաքական ղեկավարների գործով դատավարութիւնը։ Նիստին շարունակւել է հայ գերիների հարցաքննութիւնը։ Տեղեկացնում է Aparaj.am-ը:

Դատավարութեան մանրամասները ադրբեջանական իշխանութիւնների կողմից վերահսկւող լրատւամիջոցներից է հաղորդւում։

Ըստ տելեգրամեան ալիքների հաղորդումների՝ երէկ նիստի ընթացքում դատախազները հարցեր են ուղղել Արցախի ԱԺ նախագահ Դաւիթ Իշխանեանին:

Դաւիթ Իշխանեանը հաստատել է, որ եղել է «Հ. Յ. Դաշնակցութիւն» կուսակցութեան ակտիւ անդամ եւ երկու տարի Արցախի խորհրդարանում «Դաշնակցութիւն» խմբակցութիւնն է ղեկավարել:

Դաւիթ Իշխանեանն ասել է նաեւ, որ Արցախեան առաջին պատերազմին միացել է 1992 թւականի ամռանը՝ որպէս «Հ. Յ. Դաշնակցութիւն» կուսակցութեան անդամ:

Պատասխանելով գլխաւոր դատախազի աւագ օգնական Վուսալ Ալիեւի հարցերին՝ Դաւիթ Իշխանեանն ասել է, որ 90-ական թւականներին Արցախի բանակի ղեկավարումն իրականացրել է ինքնապաշտպանութեան կոմիտէն, որի առաջնորդները Սերժ Սարգսեանն ու Սամուէլ Բաբայեանն են եղել, բայց կառավարման մեխանիզմի մասին ոչինչ չի կարող ասել:

Նա նաեւ նշել է, որ արցախեան առաջին պատերազմի ժամանակ գումարտակի հրամանատար է եղել եւ իր վերադասն էր Մոնթէ Մելքոնեանը: «Մարտունիում ութ գումարտակ կար, որոնցից մէկի հրամանատարը ես էի, այդ ութ գումարտակը գտնւում էր շրջանի պաշտպանական գծի ենթակայութեան տակ, որի ղեկավարը Մոնթէ Մելքոնեանն էր, իսկ բանակի հրամանատարը՝ Սամուէլ Բաբայեանը»,- ասել է Դաւիթ Իշխանեանը:

Նա նաեւ ասել է, որ արցախեան երկրորդ պատերազմի ժամանակ այցելել է Մարտունու շրջանի զօրամասերից մէկը. «Իմ կրտսեր տղան այնտեղ ծառայում էր, եւ նաեւ որպէս պատգամաւոր՝ իմ պարտքն էր անել այդ»,- ասել է Դաւիթ Իշխանեանը:

Նա նշել է, որ արժանացել է «Մարտական ​​խաչ» շքանշանին իր մարտական ​​գործունէութեան համար։

Դատախազն ասել է, որ Դաւիթ Իշխանեանը 2023 թւականի օգոստոսի 30-ի ասուլիսում յայտարարել է, որ բաց նամակներ է ուղարկել Ռուսաստանի, Իրանի, Ֆրանսիայի, ԱՄՆ-ի եւ եւրոպական երկրների խորհրդարանների նախագահներին՝ կոչ անելով ճնշում գործադրել Ադրբեջանի վրայ։ «Ո՞րն էր այդ նամակների բովանդակութիւնը։ Ինչպիսի՞ ճնշումներ էիք կոչ անում կիրառել Ադրբեջանի նկատմամբ»,- հարցրել է դատախազը:

Դաւիթ Իշխանեանը պատասխանել է. «Այո, ես նման նամակներ եմ ուղարկել, բայց տեղեակ չեմ՝ արդեօք այդ նամակները հասե՞լ են իրենց նպատակակէտին»։

Այնուհետեւ Դաւիթ Իշխանեանին հարցրել են, թէ ո՞րն է եղել «Ադրբեջանի դէմ Հայաստանի ռազմական ագրեսիայի նպատակը»: Իշխանեանն ասել է. «Այդ ժամանակաշրջանի մասին չեմ կարող խօսել, քանի որ այն ժամանակ շատ երիտասարդ էի, բայց երբ չափահաս դարձայ, հասկացայ, թէ որոնք են ռազմավարական նպատակներն ու ռազմավարական սկզբունքները. ռազմավարական նպատակը Արցախի միաւորումն էր Հայաստանին»։

Դաւիթ Իշխանեանը խօսել է նաեւ Արցախի նախկին պետնախարար Ռուբէն Վարդանեանի հետ յարաբերութիւնների եւ իրեն պատկանող հիւրանոցում նրա գտնւելու մասին. «Ռուբէն Վարդանեանի հետ ծանօթացել եմ 2010-ին կամ 2011-ին, նա սիրում էր այցելել մեր հիւրանոց, նա հանդիպումներ էր ունենում հիւրանոցում մինչեւ պետական ​​նախարար դառնալը եւ դրանից յետոյ»,- ասել է Դաւիթ Իշխանեանը:

Նա նշել է, որ իր ծննդեան վկայականում գրւած է, որ ինքը ծնւել է Ադրբեջանական Խորհրդային Սոցիալիստական ​​Հանրապետութիւնում, սակայն Հայաստանի Հանրապետութեան քաղաքացի է։ «Խորհրդային Միութեան փլուզումից յետոյ, ինչպէս 150.000 հայերը, ես էլ եմ ընդունել ՀՀ քաղաքացիութիւն, ունեմ ՀՀ անձնագիր, ՀՀ քաղաքացի եմ, դա գրւած է նաեւ իմ անձնագրում, որը ներկայումս գտնւում է քննչական մարմնում»,- ասել է Դաւիթ Իշխանեանը:

Դատական ​​յաջորդ նիստը նշանակւել է ապրիլի 5-ին։ Յաջորդ նիստին կը շարունակւի գերիների հարցաքննութիւնը։

 

Բաքւում երէկ «հարցաքննւել է» գեներալ–մայոր Դաւիթ Մանուկեանը

Բաքւում ապրիլի 4-ին տեղի է ունեցել Արցախի ռազմաքաղաքական ղեկավարների շինծու գործերով հերթական «դատավարութիւնը»։ Այս մասին հաղորդում են ադրբեջանական լրատւամիջոցները։

Երէկ «հարցաքննւել» է Արցախի ՊԲ նախկին հրամանատարի տեղակալ, գեներալ-մայոր Դաւիթ Մանուկեանը։

Պատասխանելով դատախազին՝ Մանուկեանը խօսել է նաեւ Ռուբէն Վարդանեանի հետ իր յարաբերութիւնների մասին, ով նոյնպէս ներկայում ապօրինի պահւում է Ադրբեջանում։

Նա ասել է, որ Վարդանեանը 2023 թւականի սեպտեմբերի 27-ին ձերբակալւել է իր մեքենայով։ «Հինգ հոգով էինք, զրուցում էինք, Վարդանեանն էլ այնտեղ էր, հարցրի՝ ի՞նչ էք անելու։ Նա հարցրեց՝ իր մեքենայում տեղ կա՞յ։ Ես ասացի՝ «հարեւանն էլ է ուզում մեզ հետ գալ»։ Զանգահարեցի կնոջս ու հարցրի՝ վստա՞հ է, որ հարեւանը կը գայ, նա ասաց՝ «ոչ, որդին գտել է մեքենայ»: Վարդանյանին ասացի, որ մեքենայի մէջ տեղ կայ։ Յետոյ մեզ կանգնեցրին Լաչինի սահմանային անցակէտում»,- պատմել է Դաւիթ Մանուկեանը։

Յաջորդ «նիստը» տեղի է ունենալու ապրիլի 7-ին։

Ընդհանուր առմամբ, դատարանի առաջ կանգնել է 16 հայ՝ Արցախի նախկին նախագահներ Արայիկ Յարութիւնեանը, Արկադի Ղուկասեանը, Բակօ Սահակեանը, ԱԺ նախկին նախագահ Դաւիթ Իշխանեանը, Պաշտպանութեան բանակի ԶՈՒ շտաբի նախկին պետ Դաւիթ Մանուկեանը, ԱԳ նախկին նախարար Դաւիթ Բաբայեանը,ՊԲ նախկին հրամանատար Լեւոն Մնացականեանը, Արցախի նախկին պետնախարար Ռուբէն Վարդանեանը, քաղաքացիական անձինք՝ Վասիլի Բեգլարեանը, Էրիկ Ղազարեանը, Դաւիթ Ալավերդեանը, Գուրգէն Ստեփանեանը, Լեւոն Բալայեանը, Մադաթ Բաբայեանը, Գարիկ Մարտիրոսեանը, Մելիքսեթ Փաշայեանը:

Ադրբեջանի գլխաւոր դատախազի որոշմամբ՝ 1987-ի հոկտեմբերից մինչեւ 2024-ի ապրիլի 22-ն ընկած ժամանակահատւածում կատարւած «յանցագործութիւնների» առնչութեամբ գլխաւոր դատախազութեան եւ երկրի այլ քննչական մարմինների կողմից քննւած 1,389 քրէական գործերը միաւորւել են մէկ վարոյթում։