ԱԳՆ. «Իրանը ջանք չի խնայի Սիրիայում անվտանգութեան հաստատմանը նպաստելու համար»
«ԱԼԻՔ» – Սիրիայի իրադարձութիւնների վերաբերեալ ԱԳ նախարարութիւնը հանդէս է եկել յայտարարութեամբ, վերահաստատելով Իրանի Իսլամական Հանրապետութեան քաղաքականութիւնը, որն ուղղւած է Սիրիայի միասնութիւնը, տարածքային ամբողջականութիւնը եւ ազգային ինքնիշխանութիւնը յարգելուն:
ԱԳ նախարարութիւնն ընդգծել է, որ Իրանը ջանք չի խնայի Սիրիայում անվտանգութեան հաստատմանը նպաստելու համար:
Ըստ ԱԳՆ-ի՝ Սիրիայի ճակատագրի եւ նրա ապագայի որոշումն այդ երկրի ժողովրդի բացառիկ իրաւունքն է՝ առանց որեւէ ապակառուցողական արտաքին միջամտութեան կամ պարտադրանքի։
«Նման կարեւոր հարցի իրականացումը պահանջում է ռազմական բախումների շուտափոյթ դադարեցում, ահաբեկչական գործունէութեան կանխարգելում եւ սիրիական հասարակութեան բոլոր շերտերի մասնակցութեամբ ազգային երկխօսութեան սկիզբ՝ սիրիացի ողջ ժողովրդին ներկայացնող ներառական կառավարութիւն ձեւաւորելու նպատակով»,- ասւած է յայտարարութեան մէջ:
Իրանի արտաքին քաղաքական գերատեսչութիւնն իր յայտարարութեան մէջ շեշտել է նաեւ Իրանի եւ Սիրիայի ժողովրդների դարաւոր բարեկամական կապերը՝ նշելով, որ ակնկալւում է, որ այդ կապերը կը շարունակւեն ընդհանուր շահերի եւ միջազգային իրաւական պարտաւորութիւնների յարգման վրայ հիմնւած իմաստուն եւ խոհեմ մօտեցման դէպքում. «Իրանի եւ Սիրիայի ժողովրդների յարաբերութիւնները վաղնջական պատմութիւն ունեն եւ միշտ բարեկամական են եղել: Ակնկալւում է, որ այս յարաբերութիւնները կը շարունակւեն՝ երկու երկրների խելամիտ եւ հեռատես մօտեցմամբ եւ ընդհանուր շահերի հիման վրայ»:
ԱԳ նախարարութիւնն ընդգծել է, որ պաշտօնական Թեհրանը կը շարունակի ուշադիր հետեւել Սիրիայում իրադարձութիւնների զարգացմանը եւ համապատասխան դիրքորոշումներ ու մօտեցումներ կը դրսեւորի՝ հաշւի առնելով այդ երկրի քաղաքական ասպարէզում եւ անվտանգութեան ոլորտում ազդեցիկ դերակատարների վարքագիծը։
