Պաղեստինում ստեղծւած իրավիճակի լուծումը համապարփակ հանրաքւէի անցկացումն է

«ԱԼԻՔ» – ԱԳ նախարարութեան պաշտօնական ներկայացուցիչ Նասեր Քանանին անդրադարձել է նախօրէին Իսրայէլի դէմ հրապարակւած ՄԱԿ-ի միջազգային դատարանի կարծիքին։

«Իրանի Իսլամական Հանրապետութիւնը կարծում է, որ ճնշւած պաղեստինեան ազգի ինքնորոշման հիմնարար իրաւունքը շարունակաբար ոտնահարւել է վերջին տարիներին, յատկսպէս մանկասպան իսրայէլական ռեժիմի կազմաւորման յայտարարութիւնից յետոյ, եւ այն դեռեւս շարունակւում է եւ սահմանափակւած չէ տւեալ ժամանակահատւածով։ Վերջին մի քանի ամիսների ընթացքում Գազայում ցեղասպանութիւնը, մարդկութեան դէմ յանցագործութիւնները եւ ռազմական յանցագործութիւններ կատարելը յանգեցրել է պաղեստինեան ազգի ինքնորոշման իրաւունքի շարունակական ոտնահարմանը»,- նշել է նա։

Քանանին անդրադառնալով միջազգային տարբեր ատեանների եւ կազմակերպութիւնների կողմից Իսրայէլի դէմ ընդունւած բազմաթիւ բանաձեւերին եւ որոշումներին յաւելել է. «Ակնկալում ենք, որ միջազգային հանրութիւնը, յատկապես ՄԱԿ-ի Անվտանգութեան խորհուրդը, գործնական քայլեր կը ձեռնարկեն սիոնիստական ​​ռեժիմի ղեկավարներին պատասխանատւութեան ենթարկելու եւ պաղեստինեան ազգի դէմ այդ ​​ռեժիմի ագրեսիան ու պաղեստինեան հողերի անօրինական օկուպացումը դադարեցնելու համար»։

ԱԳՆ մամլոյ խօսնակը յիշեցնելով հակամարտութեան արդարացի կարգաւորմանն ուղղւած պաշտօնական Թեհրանի առաջարկի մասին ասել է. «Օկուպացւած Պաղեստինում առկայ անօրինական իրավիճակին վերջ տալու ամենաարդիւնաւէտ լուծումը Իրանի Իսլամական Հանրապետութեան առաջադէմ գաղափարի գործնական իրականացումն է՝ համապարփակ հանրաքւէ անցկացնել Պաղեստինի բոլոր բնակիչների եւ հիմնական քաղաքացիների՝ ներառեալ մահմեդականների, հրեաների եւ քրիստոնեաների մասնակցութեամբ»։

Յիշեցնենք, որ նախօրէին ՄԱԿ-ի միջազգային դատարանը հրապարակել է իր կարծիքը, համաձայն որի` Իսրայէլի բնակեցման քաղաքականութիւնը եւ բնական ռեսուրսների շահագործումը «հակասում են միջազգային իրաւունքին»։

Պաշտպանելով պաղեստինեան ազգի՝ անկախ ու միասնական պետութիւն ստեղծելու պատմական իրաւունքը՝ դատարանը յայտարարել է, որ բռնազաւթւած պաղեստինեան հողերը ինտեգրւած, ինքնիշխան եւ միասնական տարածք են, որը պէտք է յարգւի։