Լաւրով. «Հաւանաբար, Հայաստանում լսել են «պատրաստ լինել մի քանի ցուրտ ձմեռների» խորհուրդը»
«ԱԼԻՔ» – «Մենք բազմիցս յայտնել ենք մեր հայ ընկերներին, որ ո՛չ Վաշինգտոնը, ո՛չ Բրիւսէլը իրականում չեն մտածում իրենց գործընկերների ճակատագրի եւ շահերի մասին»։
Այս մասին ըստ News.am-ի՝ ասւում է ՌԴ ԱԳՆ պատասխաններում՝ լրատւամիջոցների հարցերին, որոնք ստացւել են արտգործնախարար Սերգէյ Լաւրովի ասուլիսում։
«Արեւմուտքում սովոր են դրանք ընկալել բացառապէս ուտիլիտարիստական ձեւով։ Երեւանը չէր կարող ուշադրութիւն չդարձնել անցեալ տարեվերջին Վրաստանում ծաւալւած իրադարձութիւններին։ Հաւանաբար Հայաստանում լսել են նաեւ աղմկայարոյց ցինիկ յայտարարութիւնները՝ եւրոպացիների համար Երեւանը Մոսկւայից «անջատելու» «նախագծի ցածր գնի» եւ հայ բնակչութեանը «մի քանի ցուրտ ձմեռների» պատրաստ լինելու խորհուրդների մասին: Այդ թւում է ամերիկեան Stratfor վերլուծական կենտրոնի վերջին կանխատեսումը, որը յայտնի է ամերիկեան հետախուզական գործակալութիւնների հետ սերտ կապերով։ Այն պարզ տեքստով նշում է, որ վարչակազմի փոփոխութիւնից յետոյ Վաշինգտոնը դժւար թէ ունենայ նոյն բուռն հետաքրքրութիւնը Հայաստանի նկատմամբ։
Մոսկւան միշտ արժեւորել է եւ շարունակում է արժեւորել Երեւանի հետ եղբայրական յարաբերութիւնները։ Մենք Հայաստանը համարում ենք մեր բնական ռազմավարական գործընկերներից եւ դաշնակիցներից մէկը։ Մենք հաւատարիմ ենք երկկողմ մակարդակով եւ ընդհանուր ինտեգրացիոն ասոցիացիաների շրջանակներում ձեւաւորւած առեւտրատնտեսական եւ ռազմաքաղաքական ոլորտներում Հայաստանի հետ կնքւած համաձայնագրերի ողջ շրջանակին։ Միեւնոյն ժամանակ, Ռուսաստանը չունի թաքնւած օրակարգ կամ «նախագծեր», որոնց իրականացումը վնասակար ազդեցութիւն կունենայ Հայաստանի անվտանգութեան կամ տնտեսական բարեկեցութեան վրայ։
Դա հաստատում են երկկողմ առեւտրատնտեսական համագործակցութեան ցուցանիշները։ Հաշւարկները դեռ աւարտւած չեն, բայց արդէն կարելի է ասել, որ 2024 թւականի ապրանքաշրջանառութիւնը բացարձակ ռեկորդ է սահմանել։ Ի դէպ, Հայաստանի՝ ե՛ւ ԵՄ-ի ե՛ւ ԱՄՆ-ի միջեւ ապրանքաշրջանառութեան ծաւալը, որոնք Հայաստանին կոչ են անում հրաժարւել ռուսական շուկայից, շատ աւելի փոքր է եւ նոյնպէս անկում է ապրում։
Ռուսաստանը շարունակում է մնալ Հայաստանի հիմնական առեւտրային եւ ներդրումային գործընկերը։ Տնտեսական համագործակցութեան երկկողմ միջկառավարական յանձնաժողովի հերթական նիստն անցաւ արդիւնաւէտ։ Մենք բարձր ենք գնահատում ԵԱՏՄ մարմիններում Հայաստանի նախագահութեան արդիւնքները 2024 թւականին։ Կասկածից վեր է, որ Հայաստանի մասնակցութիւնը եւրասիական ինտեգրմանը մեծապէս ապահովել է վերջին տարիներին նրա ՀՆԱ-ի արագ աճը։ Միեւնոյն ժամանակ, մենք ստիպւած ենք եւս մէկ անգամ ընդգծել՝ եւրասիական տնտեսական ինտեգրումն ու անդամակցութիւնը Եւրամիութեանն անհամատեղելի են։
Յուսով ենք, որ գալիք տարում մեզ կը յաջողւի զգալի առաջընթաց գրանցել մի շարք կարեւոր ծրագրերի իրականացման գործում, ինչպէս նաեւ կը մեծացնենք մշակութային, հումանիտար եւ միջտարածաշրջանային փոխանակումների դինամիկան»,- ասւած է յայտարարութեան մէջ։
