Վարդան Օսկանեան. «Այդ ժպտացող լուսանկարների յետեւում այս «յաջողութեան» իրական գինն է՝ Լեռնային Ղարաբաղի կորուստ»
«ԱԼԻՔ» – «Ահա եւ վերջապէս Հայաստանը եւ Պակիստանը ստորագրեցին դիւանագիտական յարաբերութիւններ հաստատելու մասին արձանագրութիւնը՝ մի քայլ, որը ներկայացւում է որպէս «ձեռքբերում»»։ Իր ֆէյսբուքեան էջում գրել է ՀՀ ԱԳ նախկին նախարար Վարդան Օսկանեանը՝ անդրադառնալով Հայաստանի եւ Պակիստանի միջեւ դիւանագիտական յարաբերութիւններ հաստատելու մասին արձանագրութեան ստորագրմանը:
«Պակիստանը երեք տասնամեակ շարունակ հրաժարւում էր ճանաչել Հայաստանին Լեռնային Ղարաբաղի պատճառով։ Իսկ հիմա, իբր, կարող ենք ունենալ «բարեկամական յարաբերութիւններ»։ Ինչ հիանալի դիւանագիտական յաղթանակ։
Չես կարող չմտածել՝ եթէ հայ ժողովրդին ընտրութիւն առաջարկւէր՝ փաստացի անկախ հայկական Լեռնային Ղարաբաղի՞, թէ՞ Իսլամաբադի հետ դիւանագիտական կապերի միջեւ, ո՞րը կընտրէին։
Այդ ժպտացող լուսանկարների յետեւում այս «յաջողութեան» իրական գինն է՝ հազարաւոր հայերի կեանքեր, Լեռնային Ղարաբաղի կորուստ եւ 150,000 մարդու բռնի տեղահանում իրենց հայրենի հողից։ Բայց ոչինչ, առնւազն արձանագրութիւն ստորագրեցինք։ Սա հաստատ հիանալի կերեւայ ԱԳՆ տարւայ ամփոփիչ հաշւետւութեան մէջ»,- գրել է նա։
