Գառնիկ Դաւթեան. ««Արեւմտեան Ադրբեջան» քաղաքական ծրագրի նպատակը Հայաստանն ադրբեջանցիներով բնակեցնելն է»
«ԱԼԻՔ» – Օգոստոսի 5-ին, Երեւանի Սուրբ Աննա եկեղեցու բակում կայացած Սրբազան շարժման հերթական հաւաքի ժամանակ, «Արեւմտեան Ադրբեջան. Երեւանը գրաւելու յատուկ ծրագիրը» բանախօսութեամբ հանդէս է եկել ադրբեջանագէտ Գառնիկ Դաւթեանը:
Նա նշել է, որ 2021 թւականին Ալիեւի յայտարարութիւնից յետոյ «Արեւմտեան Ադրբեջան» հակահայկական կառոյցը սկսեց աւելի ակտիւ գործել, իսկ հիմնական թեզը հետեւեալն էր․ «Մենք Երեւան կը վերադառնանք ոչ թէ տանկերով, այլ ոտքով, մեքենաներով եւ ինքնաթիռներով»։
«Փաստացի սկիզբ դրւեց «Արեւմտեան Ադրբեջան»-ի քաղաքական ծրագրին, որի նպատակը Հայաստանն ադրբեջանցիներով բնակեցնելն է։ Ըստ այդ ծրագրի, իրենք չեն վստահում Հայաստանի իշխանութիւններին եւ Հայաստան տեղափոխւած ադրբեջանցիները պէտք է ցանկանան այնպիսի մանդատ, որը կապահովի իրենց անվտանգութիւնը։ «Արեւմտեան Ադրբեջան»-ը բաւականին լուրջ աշխատանք է տանում միջազգային կառոյցներում, հանդիպում է տարբեր պաշտօնեաների հետ, ներկայացնում է իրենց «մշակոյթը», որը մեր բազմադարեայ մշակոյթի պատճէն է»,- նշել է փորձագէտը։
