Պուտինը մեկնաբանել է իրավիճակը Մերձաւոր Արեւելքում
«ԱԼԻՔ» – ՌԴ նախագահ Վլադիմիր Պուտինը յայտարարել է, որ Մոսկւան կապի մէջ է ե՛ւ Իսրայէլի, ե՛ւ Պաղեստինի հետ: Հաղորդում է News.am-ը՝ ռուսական ՏԱՍՍ-ին յղումով:
Ըստ Պուտինի՝ կարգաւորման հիմնական ճանապարհը պաղեստինեան պետութեան ստեղծումն է։ Պուտինի համոզմամբ՝ Իսրայէլը պաղեստինեան խնդիրը միայն պաղեստինցիների համար նիւթական խթաններով չի կարող լուծել, նշելով որ կարեւոր են նաեւ հոգեւոր խնդիրները։
«Պաղեստինցիները չեն լքի իրենց հողը»,- համոզմունք է յայտնել ՌԴ նախագահը։ Պուտինն առաջարկել է վերադառնալ Մերձաւոր Արեւելքի հարցով «քառեակի» ձեւաչափին կամ նոյնիսկ ընդլայնել այն։
Նրա գնահատմամբ՝ Իրան-Իսրայէլ ուղու վրայ ամէն ինչ չափազանց լարւած է։
«Եթէ բանը հասնի պատերազմի, երկու երկրների զինւորներն էլ այնտեղ ուղղակիօրէն կը կռւեն։ Մենք կապի մէջ ենք Իսրայէլի եւ Իրանի հետ, ունենք բաւականին վստահելի յարաբերութիւններ, եւ մենք իսկապէս կը ցանկանայինք, որ այս անվերջանալի հարւածների փոխանակումը դադարեցւի։ Եւ անհրաժեշտ է գտնել իրավիճակի կարգաւորման այնպիսի ուղիներ, որոնք երկու կողմերին էլ կը բաւարարեն»,- ընդգծել է Պուտինը։
Նա շեշտել է, որ այս հարցի պատասխանը միշտ փոխզիջումների որոնման մէջ է, որոնք հնարաւոր են տւեալ իրավիճակում, որքան էլ դա դժւար լինի։
