«ԱԼԻՔ» – Իրանի Իսլամական խորհրդարանում կրօնական փոքրամասնութիւնների հինգ պատգամաւորները դատապարտել են Իսրայէլի գործողութիւնները կապւած վերջին օրերին Սիրայում տեղի ունեցող իրադարձութիւնների վերաբերեալ: Պատգամաւորները հրապարակած յայտարարութեամբ Սիոնիստական ռեժիմի յարձակումները Սիրիայի ռազմական եւ տնտեսական ենթակառուցւածքների ոչնչացման, ինչպէս նաեւ Սիրիայի բռնազաւթումը անօրինական եւ յանցաւոր արարք համարելով, նշել են, որ օր առաջ պէտք է այս ոճռագործութիւնը դատապարտւի ՄԱԿ-ի Անվտանգութեան խորհուրդի եւ աշխարհի բոլոր երկրների կողմից:
Յայտարարութեան մէջ մասնաւորապէս նշւած է. «Սիրիան, որպէս «Դիմադրութեան առանցք»-ի կարեւոր երկրներից մէկը, ինչպէս նաեւ տարբեր կրօնների եւ դաւանանքների սրբավայրերի առկայութեան պատճառով, կրկնակի նշանակութիւն ունի մուսուլման եւ քրիստոնեայ ժողուուրդների համար։ Ուստի մենք՝ Իրանի կրօնական համայնքների պատգամաւորներս, բարձր ենք գնահատում Յեղափոխութեան Գերագոյն առաջնորդ Այաթ. Խամենէիի յայտարարութիւնները կապւած տարածաշրջանի զարգացումների եւ մեկնաբանած հեռանկարների հետ, ինչը Յեղափոխութեան առաջնորդի ճկուն մարտավարութեան եւ խելամտութեան ապացոյցն էր՝ տարածաշրջանում տեղի ունեցող կարեւոր իրադարձութիւնների վերաբերեալ»։
Յայտարարութեան մէկ այլ բաժնում նշւած է. «Սիրիայի ինքնիշխանութեան ու տարածքային ամբողջականութեան նկատմամբ անտարբերութիւնը եւ ժողովրդի կամքի անտեսումը հանգեցնելու է Սիրիայի կազմաքանդմանը այդ երկիրը կանգնեցնելով աշխարհագրական կործանման վտանգի առաջ։ Եթէ այս վտանգը հիմա չկանխւի, ապա միւս երկրները եւս զերծ չեն մնայ Իսրայէլի եւ թաքֆիրիականների նկրտումներից: Վկան՝ վերջին օրերին Սիրիայում քրիստոնէական սրբավայրերի աւերումներն ու պղծումն էր՝ Ալ-Ջոլանիի հետ կապւած մարդկանց կողմից: Իսկ այդ տարածաշրջանային ճգնաժամը ի վերջոյ կը հանգեցնի համաշխարհային աղէտի»:
Յայտարարութեան վերջում նշւած է. «Ուստի մենք՝ Իսլամական խորհրդարանում կրօնական համայնքների պատգամաւորներս, Իրանի արժանապատիւ ժողովրդի հետ, ովքեր եղել են «մէյդան»-ի ու դաշտի դրօշակակիրներն՝ իրենց կեանքն ու գումարը չխնայելով ու նւիրաբերելով «Դիմադրութեան ճակատ»-ին, շարունակելու ենք աջակցել ճնշւած ժողովուրդներին սատարող Իրանի քաղաքականութեանը»:
