Պաշտպանութեան նախարար. «Իրանը պատերազմ չի ցանկանում, բայց վճռական պատասխան կը տայ ցանկացած ագրեսիայի»
«ԱԼԻՔ» – Պաշտպանութեան նախարար, բրիգադային գեներալ Ազիզ Նասիրզադէն առանձին հեռախօսազրոյցներ է ունեցել Թուրքիայի եւ Մալայզիայի պաշտպանութեան նախարարների հետ։
Գեներալ Նասիրզադէն թուրք գործընկերոջ հետ հեռախօսազրոյցում նշել է, որ Իրանի դէմ յարձակումները տեղի են ունեցել բանակցութիւնների ընթացքում, ինչով ապացուցւեց, որ իրանական կողմը չէ, որ դէմ է բանակցութիւններին ու երկխօսութեանը։
Պաշտպանութեան նախարարը յաւելել է նաեւ, որ նման պայմաններում հրադադարը վստահութիւն չի ներշնչում Իրանին, հետեւաբար, սեղանին են դրւած տարբեր սցենարներ ցանկացած նոր արկածախնդրութեան դէմն առնելու համար։
Նոյն օրը Մալայզիայի պաշտպանութեան նախարարի հետ զրոյցում գեներալ Նասիրզադէն շնորհակալութիւն է յայտնել Մալայզիայի կառավարութեանը՝ ԱՄՆ-ի եւ սիոնիստական ռեժիմի կողմից պարտադրւած պատերազմի ընթացքում Իրանի Իսլ. Հանրապետութեանն աջակցելու հարցում ցուցաբերած դիրքորոշման համար եւ նշել. «Մալայզիան կարեւոր ու ազդեցիկ երկիր է Արեւելեան Ասիայի տարածաշրջանում, եւ Մալայզիայի կառավարութեան դիրքորոշումը իսլամական աշխարհում տեղի ունեցող զարգացումների եւ միջազգային հարցերի վերաբերեալ միշտ եղել է արդար եւ գնահատելի»։ Մալայզիայի պաշտպանութեան նախարարը եւս նշել է, որ Իրանը Մալայզիայի համար բարեկամ եւ յուսալի երկիր է, եւ յաւելել. «Մենք Իսրայէլին դիտարկում ենք որպէս այս պատերազմի գլխաւոր մեղաւորը եւ առաջին իսկ պահից խստօրէն դատապարտել ենք ոտնձգութեան այս փորձը»։
