Բագրատ Սրբազան. «Արցախեան ոչ թէ շարժումը, այլեւ յատկապէս յաղթանակն ու պայքարը շարունակւելու է, իսկ ուրացումը, վստահ եմ, կը ստանայ իր բաժին պատիժը»
«ԱԼԻՔ» – «Սրբազան շարժման» առաջնորդ, քաղբանտարկեալ Բագրատ արքեպիսկոպոս Գալստանեանը ժողովրդին կոչ է արել եւ յորդորել է սեպտեմբերի 2-ին Երեւանի «Ազատութեան» հրապարակում մասնակցել Միասնութեան հանրահաւաքին: Այս մասին նա գրել է կալանավայրից հրապարակած իր հերթական նամակում:
Նամակում մասնաւորապէս նշւած է.
«Սիրելինե՛ր,
Ցաւօք, այս պահին միայն այս կերպով կարող եմ հաղորդակցւել ձեզ հետ այս մեծ եւ կարեւորագոյն օրւայ՝ Արցախի Հանրապետութեան անկախութեան հռչակման առիթով։
Սեպտեմբերի 2-ը մեր պատւի եւ արժանապատւութեան վերականգնման կարեւորագոյն հանգրւաններից մէկն է եղել եւ մնում՝ տօն, որը Աստւածատուր է՝ նւաճւած մեր բազում եղբայրների ու քոյրերի արեան ու տառապանքի գնով։
Ի հեճուկս բոլոր ստրկածինների եւ նրանց գլխաւորի, Արցախեան ոչ թէ շարժումը, այլեւ յատկապէս յաղթանակն ու պայքարը շարունակւելու է, իսկ ուրացումը, վստահ եմ, կը ստանայ իր բաժին պատիժը։
Այսու, կոչ եմ անում եւ յորդորում մեր բոլոր աջակիցներին եւ համակիրներին Սեպտեմբերի 2-ին «Ազատութեան» հրապարակում մասնակցել Միասնութեան հանրահաւաքին՝ թէ՛ ներքին ուրացողներին, եւ թէ՛ արտաքին աշխարհին եւս մէկ անգամ փաստելու եւ վկայելու, որ մեզ ո՛չ յաղթել եւ ո՛չ էլ առաւել եւս սպանել չի լինի, որքան էլ զօրանան դարձեալ պարտութեան են մատնւելու, զի Աստւած ընդ մեզ է։
Շատ պիտի փափագէի Սեպտեմբերի 2-ին՝ այդ սրբազան օրը տեսնել եւ ողջագուրւել բոլորիդ հետ… Համարէք, որ այդպէս է՝ տեսնել ձեր անկոտրում կամքը, անսասան հաւատքը, վառւող աչքերը եւ անմնացորդ սէրը հանդէպ մեր Արցախ աշխարհը, մեր ինքնութիւն եւ մեր յաղթանակող Հայաստան աշխարհը։
Յիշէ՛ք, մի՛ վախեցէք, այլ միայն հաւատացէք։
Յաղթանակն այլընտրանք չունի…
Չեմ մոռանալու յանուն քեզ, Հայաստան եւ չեմ ներելու յանուն քեզ, Արցախ»:
