Իրանի Իսլամական խորհրդարանի պատգամաւորները յայտարարութիւն են տարածել՝ ի աջակցութիւն Իսլամական յեղափոխութեան առաջնորդի վերջին ուղերձի, այն բնութագրելով որպէս երկրի արժանապատւութեան, անկախութեան, անվտանգութեան եւ ազգային համախմբւածութեան պահպանման ռազմավարական ուղենիշ։
Պատգամաւորների մեծամասնութեան ստորագրութեամբ ընդունւած յայտարարութեան մէջ ընդգծւել է ազգային միասնութեան պահպանման, երկրի շահերի պաշտպանութեան եւ ազգային հզօրութեան ամրապնդման անհրաժեշտութիւնը։ Նրանք նաեւ յայտնել են, որ խորհրդարանը կօգտագործի իր օրէնսդրական լիազօրութիւնները՝ ուղերձում ներկայացւած յանձնարարականների իրականացման համար։
Pars Today-ի հաղորդմամբ՝ յայտարարութեան մէջ, անդրադառնալով «Իրանի նահատակ առաջնորդի» հրաժեշտի արարողութեանը ժողովրդի լայն մասնակցութեանը, նշւում է, որ դա վկայում է ժողովրդի եւ Իսլամական յեղափոխութեան իդէալների, ինչպէս նաեւ անձնազոհութեան եւ դիմադրութեան մշակոյթի միջեւ խոր կապի մասին։
Պատգամաւորները նաեւ, անդրադառնալով ԱՄՆ-ի կողմից ստանձնած պարտաւորութիւնների բազմակի խախտումներին, ընդգծել են, որ արտաքին քաղաքականութեան վերաբերեալ որոշումները պէտք է ընդունւեն արժանապատւութեան, իմաստութեան եւ նպատակայարմարութեան սկզբունքների հիման վրայ՝ յենւելով նաեւ ստուգելի երաշխիքների վրայ։ Յայտարարութեան աւարտին խորհրդարանը վերահաստատել է իր հաւատարմութիւնը Իսլամական յեղափոխութեան առաջնորդին եւ Իրանի ժողովրդին՝ ընդգծելով ազգային միասնութեան պահպանման, ժողովրդի եւ իշխանութիւնների միջեւ համերաշխութեան ամրապնդման ու թշնամիների դաւադրութիւններին դիմակայելու անհրաժեշտութիւնը։
