ՀՀԿ Գործադիր մարմին. «ՀՀ-ում ձեւաւորւել է աhաբեկմшն, ճնշմшն, քաղաքական hաշւեhարդարի, «ընտրեալների» անպատժելիnւթեան մթնոլորտ»
«ԱԼԻՔ» – Նախօրէին Փարաքար համայնքի ղեկավար Վալոդիա Գրիգորեանի եւ քրէական ոստիկանութեան ծառայող Կարէն Աբրահամեանի սպանութեան առիթով, ՀՀԿ Գործադիր մարմինը դատապարտող յայտարարութիւն է տարածել:
Յայտարաութեան մէջ մասնաւորապէս նշւած է.
«Վարչապետի աթոռը զբաղեցրած կապիտուլեանտի կառուցած քրէաիշխանական համակարգի գործունէութեան պայմաններում այլեւս զարմանալի չեն անգամ ամենազարհուրելի սպանութիւնները, ընդդիմադիր հայեացքներ ունեցող մարդկանց նկատմամբ բռնաճնշումները, քաղաքական հակառակորդների հալածանքները՝ ընդհուպ մինչեւ ազատազրկում, արդարադատութեանն ուղղորդելու ակնյայտ դէպքեր, իրաւապահ համակարգը բացառապէս սեփական շահերին ծառայեցնելու եւ բազմաթիւ արատաւոր այլ դրսեւորումներ:
Հայաստանում ձեւաւորւել է ահաբեկման, ճնշման, քաղաքական հաշւեհարդարի, «ընտրեալների» անպատժելիութեան եւ այդպիսով՝ օրինազանցութեան խրախուսման մթնոլորտ, ինչը ծնում է նորանոր յանցագործութիւններ:
Սեպտեմբերի 23-ի գիշերը Մերձաւանի՝ ընդդիմադիր հայեացքներ ունեցող, սկզբունքային համայնքապետ Վալոդիա Գրիգորեանի սպանութիւնը՝ իր իսկ տան դիմաց, անկախ պատճառներից, Հայաստանի քաղաքացիների, յատկապէս ընդդիմադիր հայեացքներով մարդկանց անպաշտպանութեան ապացոյց եւ ուղերձ է՝ ուղարկւած կրակոցներով։ Նպատակը մէկն է՝ վախեցնել, լռեցնել, վերացնել առկայ բարոյազրկւած եւ ապազգային իշխանական համակարգից դուրս մտածող ցանկացած անհատի եւ ուժի, երկրում չսանձելով նաեւ յանցաւորութեան շեշտակի աճը:
Մենք յայտարարում ենք՝ չենք լռելու եւ չենք նահանջելու, քանի դեռ այս կապիտուլեանտ եւ բարոյազուրկ իշխանութիւններին չենք հեռացրել:
Կոչ ենք անում բոլոր քաղաքական առողջ ուժերին, անհատներին, իրավիճակով մտահոգ մեր հասարակութեան բոլոր անդամներին՝ չլռել, համախմբւել եւ գործել անյապաղ Հայաստանի կառավարիչների մահիշխանութեան վերջը օր առաջ տալու համար»:
Յիշեցնենք, որ սեպտեմբերի 23-ին՝ ժամը 23:52-ին, ՀՀ Ներքին գործերի նախարարութեան ոստիկանութիւն ահազանգ է ստացւել, որ Արմաւիրի մարզի Մերձաւան բնակավայրի Երեւանեան խճուղում կրակոցներ են հնչել։
Մահացել են համայնքի ղեկավար Վալոդիա Գրիգորեանն ու ՆԳՆ ոստիկանութեան Արարատի քրէական ոստիկանութեան աշխատակից Կարէն Աբրահամեանը, որը դէպքի պահին ծառայութեան մէջ չի եղել։
Մէկ քաղաքացի՝ Արծրուն Գալստեանը վիրաւորւել է:
