Ես հաւատում եմ` բանակը այն կառոյցն է, որ կարող է պատշաճ ուշադրութեան պայմաններում ամենաարագը վերականգնել իր ուժն ու հեղինակութիւնը

ՀՀ պաշտպանութեան նախկին նախարար, «Հայաստան» խմբակցութեան ղեկավար Սէյրան Օհանեանն ուղերձ է յղել Բանակի օրւայ առթիւ։ «Հայկական բանակը ձեւաւորւել է մեզ պարտադրւած պատերազմի, շրջափակման եւ աղէտալի երկրաշարժի պայմաններում՝ Հայաստանի Հանրապետութեան եւ Արցախի Հանրապետութեան անկախութեան ու պետականութեան կայացմանը զուգահեռ։

Ծանրագոյն, անհաւասար եւ սրբազան ազատամարտում, հայ ժողովրդի միասնականութեան շնորհիւ, նա դարձել է յաղթանակած, այնուհետեւ նւիրական ծառայութեամբ ճանաչւել տարածաշրջանում մրցունակ եւ միջազգային գործընկերների հետ փոխգործունակ։ Սակայն կամաւորական, ֆիդայական տարանջատւած ջոկատներից, զրոյից եւ մեծ դժւարութիւններով ստեղծւած կանոնաւոր բանակը 44-օրեայ պատերազմի ժամանակ, անփորձ ռազմաքաղաքական ղեկավարութեան անգործութեան եւ ժողովրդի միասնականութեան խաթարման հետեւանքով, նորից վերածւեց կամաւորականների խմբերի, ինչն էլ ազդեց մեր պարտութիւնների եւ դեռեւս շարունակւող անյաջողութիւնների ընթացքի վրայ։ Աներկբայ է, որ բանակը եղել եւ մնում է մեր անվտանգութեան կարեւոր երաշխաւորը, տարածաշրջանում կայունութեան եւ խաղաղութեան ամրապնդման գործում որոշիչ դերակատարը եւ միշտ կը մնայ, առաւել եւս հիմա՝ մեզ ուղղւած սպառնալիքների պայմաններում։

Պէտք է չխաբւենք Հայաստանում տիրող ժամանակաւոր, թւացեալ խաղաղութեամբ, այլ սթափ գնահատելով հակառակորդի մոլորեցնող, մեր զգօնութիւնը թուլացնող բացայայտ քայլերը՝ գործուն, արագընթաց միջոցներ ձեռնարկենք բանակի մարտունակութիւնը վերականգնելու ուղղութեամբ։ Դա կարող է տեղի ունենալ միայն մեզ ուղղւած մարտահրաւէրներին համահունչ կազմ հաստիքային եւ կառուցւածքային փոփոխութիւններով, ժամանակակից եւ յատուկ նշանակութեան նոր ստորաբաժանումների ձեւաւորմամբ ու արագ համալրմամբ։ Միեւնոյն ժամանակ անչափ կարեւոր է ժամանակակից սպառազինութեան ձեռքբերմանը զուգահեռ դրանց կիրառման հմտութիւններին տիրապետելը, որը պէտք է արտայայտւի ակտիւ մարտական պատրաստութեամբ՝ սկսած ստորաբաժանումների ներդաշնակումով եւ դաշտային վարժւածութեամբ, աւարտած խոշոր զօրավարժութիւններով։ Ես հաւատում եմ, որ Հայկական բանակը այն կառոյցն է, որ կարող է պատշաճ ուշադրութեան պայմաններում ամենաարագը վերականգնել իր ուժն ու հեղինակութիւնը եւ հետագայում նոյնպէս պատւով ծառայել ու դիմակայել մարտահրաւէրներին։ Ի սրտէ շնորհաւորելով Հայկական բանակի կազմաւորման տարեդարձը՝ մաղթում եմ բոլորին, յատկապէս սահմանին կանգնած մեր հրամանատարներին, զինւորներին անվտանգ ծառայութիւն, բարձր մարտական ոգի եւ նոր ձեռքբերումներ հայրենիքի պաշտպանութեան սուրբ գործում։ Ինչպէս ամէն օր, այնպէս էլ այսօր, խոնարհւում եւ խնկարկում ենք մեր հերոս նահատակների յիշատակի ու սխրանքի առաջ։

Yerkir.am