ԱԺ ընդդիմադիր կին պատգամաւորների յայտարարութիւնը. Կոչ ենք անում անյապաղ վերանայել Արեգնազ Մանուկեանի նկատմամբ ընտրւած խափանման միջոցը

ԱԺ ընդդիմադիր կին պատգամաւորները հանդէս են եկել Արեգնազ Մանուկեանի կալանաւորման հետ կապւած յայտարարութեամբ։

«ՀՀ ԱԺ ԸՆԴԴԻՄԱԴԻՐ ԿԻՆ ՊԱՏԳԱՄԱՒՈՐՆԵՐԻ ՀՐԱՏԱՊ ՅԱՅՏԱՐԱՐՈՒԹԻՒՆԸ

Մենք՝ Հայաստանի Հանրապետութեան Ազգային ժողովի կին պատգամաւորներս, խոր մտահոգութիւն ենք յայտնում մեր գործընկեր, «Մայր Հայաստան» կուսակցութեան վարչութեան անդամ Արեգնազ Մանուկեանի նկատմամբ որպէս խափանման միջոց ընտրւած կալանքի կիրառման առնչութեամբ։

Համոզւած լինելով, որ յարուցւած քրէական վարոյթն ուղղորդւած է գործադիր իշխանութեան կողմից եւ ակնյայտօրէն քաղաքական ենթատեքստ ունի, նաեւ խիստ վիճայարոյց է օրինական հիմքերի առկայութիւնը, այնուամենայնիւ, արձանագրում ենք, որ կալանքը քրէական դատավարութեան մէջ խափանման ծայրայեղ միջոցն է եւ կիրառւում է, երբ աւելի մեղմ միջոցներով անհնար է ապահովել վարոյթի բնականոն ընթացքը։

Օրէնքի գերակայութեան, մարդու ազատութեան եւ անմեղութեան կանխավարկածի սկզբունքները պահանջում են, որ իւրաքանչիւր նման որոշում լինի համաչափ, բաւարար հիմնաւորւած եւ անխուսափելի։

Հաշւի առնելով փաստի հանրային հնչեղութիւնը, Արեգնազ Մանուկեանի՝ քաղաքական-հասարակական գործունէութիւնը, անչափահաս երեխայ ունենալու հանգամանքը, ինչպէս նաեւ մարդու հիմնարար իրաւունքների պաշտպանութեան սկզբունքները՝ կոչ ենք անում.

1. Անյապաղ վերանայել Արեգնազ Մանուկեանի նկատմամբ ընտրւած խափանման միջոցը։

2. Կիրառել ազատութիւնից զրկելու հետ չկապւած այլընտրանքային խափանման միջոց։

3. Ապահովել քրէական վարոյթի ամբողջ ընթացքում օրէնքի, արդար դատաքննութեան եւ մարդու իրաւունքների միջազգային չափանիշների լիարժէք պահպանումը։

Այսու, յորդորում ենք ՀՀ գլխաւոր դատախազ Աննա Վարդապետեանին եւ վարոյթ իրականացնող մարմնի ղեկավար Արթուր Պօղոսեանին՝ վերանայել կալանքի անհրաժեշտութիւնը եւ ապահովել Արեգնազ Մանուկեանի կալանքից ազատ արձակումը՝ կիրառելով խափանման աւելի մեղմ, այլընտրանքային միջոց։

Հաստատում ենք, որ արդարադատութեան նկատմամբ հանրային վստահութիւնը կարող է պահպանւել միայն այն դէպքում, երբ իւրաքանչիւր որոշում հիմնւած է բացառապէս օրէնքի եւ իրաւաչափութեան սկզբունքի վրայ, այլ ոչ թէ՝ քաղաքական բռնաճնշումների։

Մենք՝ ԱԺ ընդդիմադիր կին պատգամաւորներս, մեր ամբողջական զօրակցութիւնն ենք յայտնում Արեգնազ Մանուկեանին եւ ընտանիքին՝ համոզումով, որ խօսքի, խղճի, քաղաքական հայեացքների եւ գործունէութեան ազատութիւնը անկասելի արժէքներ են։

1. Գալստեան Լիլիթ, 2. Գասպարեան Իրինա, 3. Գրիգորեան Աննա, 4. Թովմասեան Թագուհի (անկուսակցական), 5. Խամոյեան Ագնեսա, 6. Խերանեան Արմինէ, 7. Կիւրեղեան Արմենուհի, 8. Կրպէեան Ասպրամ, 9. Միրզոյեւա Զեմֆիրա, 10. Մկրտչեան Աննա («Պատիւ ունեմ» խմբակցութիւն), 11. Վարդանեան Արփինէ, 12. Վարդանեան Էլինար, 13. Վարդանեան Քրիստինէ:

07. 2026, Երեւան»,-ասւած է յայտարարութեան մէջ։