ՀՅԴ Հայաստանի կառոյցները լուծել են ԼՂ-ից բռնի տեղահանւած մօտ 1300 ընտանիքի կեցութեան եւ առօրեայ կենցաղային խնդիրները
ՀՅԴ Հայաստանի կառոյցները՝ Հայ Օգնութեան միութիւնը, «Թեւանիկ» հասարակական կազմակերպութիւնն, անհատ քաղաքացիների օժանդակութեամբ, լծւել են Լեռնային Ղարաբաղից տեղահանւած մեր հայրենակիցների աջակցութեան գործին։
Ինչպէս տեղեկացրին ՀՅԴ Հայաստանի Գերագոյն մարմնից, Երեւանի գրեթէ բոլոր վարչական շրջանների կուսակցական գրասենեակները վերածւել են աջակցութեան կենտրոնների, որտեղ ոչ միայն կուսակցականների, այլեւ մեր քաղաքացիների աջակցութեամբ եւ օժանդակութեամբ կենտրոնացւում եւ բաշխւում են հաւաքւած առաջին անհրաժեշտութեան պարագաները՝ հագուստ, հիգիենայի եւ անկողնային պարագաներ, սնունդ, դեղորայք եւ այլ ապրանքներ։
«Այս պահի դրութեամբ լուծւել է մօտ 1300 ընտանիքի կեցութեան եւ առօրեայ կենցաղային խնդիրները։ Արցախահայ հայրենակիցների օժանդակութեանն ուղղւած աշխատանքները չեն դադարում նաեւ այս պահին։
Բարեսիրական նպատակներով 1909 թ. հիմնադրւած ՀՅԴ քոյր կառոյց Հայ Օգնութեան միութիւնը բռնի տեղահանւած արցախահայերի կարիքները հոգալու նպատակով արդէն սկսել է համահայկական դրամահաւաք»,- ասւում է հաղորդագրութեան մէջ։
Ըստ աղբիւրի՝ դրամահաւաքի եւ ծրագրի իրագործման մանրամասները կը ներկայացւեն առաջիկայում։
