Դուրս բերել գործածութիւնից 7-րդ դասարանի «Հայոց պատմութիւն» դասագիրքը

Դեկտեմբերի 21-ին, Ն․Ս․Օ․Տ․Տ․ Գարեգին Երկրորդ Ծայրագոյն Պատրիարք եւ Ամենայն հայոց կաթողիկոսի նախագահութեամբ Մայր Աթոռ Սուրբ Էջմիածնում տեղի է ունեցել հայրենական կեանքի կրթական հիմնախնդիրներին նւիրւած քննարկում։ Մայր Աթոռի տեղեկատւական համակարգի հաղորդմամբ, քննարկմանը մասնակցել են Մայր Աթոռի Կրթական յանձնախմբի հոգեւորական եւ աշխարհական անդամները, կրթական հաստատութիւնների ու կառոյցների ներկայացուցիչներ, ճանաչւած մտաւորականներ ու մասնագէտներ։ Քննարկւել են հանրակրթութեան բնագաւառում ԿԳՄՍ նախարարութեան նախաձեռնած փոփոխութիւններին առնչւող հարցեր։ Մասնակիցները վերահաստատել են հանրակրթութեան պետական եւ առարկայական չափորոշիչների եւ ծրագրերի վերաբերեալ արտայայտած վերապահումները, մասնաւոր անդրադարձել են «Հայոց պատմութիւն» առարկայի 7-րդ դասարանի նոր դասագրքին։

Արձանագրւել է, որ դպրոցական յիշեալ ձեռնարկում տեղ են գտել հայեցակարգային, մեթոդաբանական, գիտական, այդ թւում եկեղեցագիտական եւ կարեւորագոյն այլ բնոյթի կոպտագոյն սխալներ ու բացթողումներ։ Խոր մտահոգութեամբ արձանագրւել է, որ դասագրքում օբիեկտիւութեամբ ու պատշաճ ծաւալով ներկայացւած չեն ազգային, պետական ու հոգեւոր կեանքի պատմական կարեւորագոյն իրադարձութիւնները, կերպարներն ու խորհրդանիշերը։

Ելնելով արտայայտւած վերապահումներից՝ քննարկման մասնակիցներն ընդգծել են, որ աղճատւած եւ սխալաշատ այս դասագրքի ուսուցմամբ խաթարւելու է սերունդների ազգային դաստիարակութեան ու կրթութեան կարեւորագոյն առաքելութիւնը։

Անհրաժեշտ է համարւել, որ ՀՀ ԿԳՄՍ նախարարութիւնը՝ դպրոցներում գործածւող վերոգրեալ դասագիրքը դուրս բերի գործածութիւնից եւ ձեռնամուխ լինի նոր դասագրքի ստեղծմանը՝ այդ գործընթացում ներգրաւելով պատմաբանների, եկեղեցականների եւ գիտակրթական հաստատութիւնների ու մասնագիտական հանրոյթի պատասխանատու ներկայացուցիչների։

Կարեւորւել է, որ կրթական ոլորտի՝ մասնաւորաբար հայագիտութեան խնդիրների վերաբերեալ պարբերաբար կազմակերպւեն նմանօրինակ քննարկումներ՝ ներդրում բերելու համար յիշեալ բնագաւառի հիմնախնդիրների կարգաւորմանը եւ որակեալ կրթութեան ապահովմանը։

Քննարկումն աւարտվել է Ն․Ս․Օ․Տ․Տ․ Գարեգին Երկրորդ Ամենայն հայոց կաթողիկոսի՝ մասնակիցներին ուղղւած գնահատանքի եւ օրհնութեան խօսքով։