««Զանգեզուրի միջանցք»-ի վերաբերեալ Իրանի ռազմավարական ճանապարհային քարտէզը» 📢
Քննարկում՝ Մերձաւոր Արեւելքի ռազմավարական հետազօտութիւնների գիտահետազօտական կենտրոնում
«ԱԼԻՔ», Կ. Դ. – «Զանգեզուրի միջանցք»-ը եւ Իրանի Իսլամական Հանրապետութեան անխախտ դիրքորոշումն այս մասին, քննարկումների եւ տարաբնոյթ մեկնաբանութիւնների պատճառ է հանդիսացել իրանական քաղաքական, իրաւական ու փորձագիտական շրջանակների մօտ:
Երէկ՝ սեպտեմբերի 16-ին Թեհրանում, Մերձաւոր Արեւելքի ռազմավարական հետազօտութիւնների գիտահետազօտական կենտրոնում տեղի ունեցաւ «ռազմավարական ճանապարհային քարտէզ» նիստերի առաջին քննարկումը, հետեւեալ խորագրով. ««Զանգեզուրի միջանցք»-ի հարցով Իրանի ռազմավարական ճանապարհային քարտէզը»:
Քննարկման ընթացքում, որը վարում էր Մերձաւոր Արեւելքի ռազմավարական-գէոպոլետիկ հարցերի ուսումնասիրութեան խմբի տնօրէն դոկտ. Ամիր Հուշանգ ՄիրՔուշեշը, դասախօսները քննադատական հայեացքով անդրադարձան ադրբեջանաիսրայէլական յարաբերութիւնների սերտացմանը, արտատարածաշրջանային ուժերի միջամտութեանը տարածաշրջանում, որի նպատակն. ըստ նրանց՝ տարածաշրջանում Իրանի ներգրաււածութիւնը չէզոքացնելն է: Նրանք կարեւորեցին Իրան-Հայաստան ռազմավարական ու սերտ համագործակցութիւնը, եւ ընդգծեցին տարածաշրջանային հարցերում Իրանի ներգրաււածութեան անհրաժեշտութիւնը:
Ելոյթով հանդէս եկաւ Համալսարանի դասախօս, անվտանգութեան-ռազմական հարցերով վերլուծաբան դոկտ. Հասան Ալային՝ քննարկելով «Զանգեզուրի միջանցք»-ի անվտանգային ու ռազմական ոլորտները: Նա կարեւորեց Իրան-Հայաստան սահմանի անխախտ գոյութիւնը՝ դատապարտելով բոլոր այն ջանքերը որոնք միտում են վերացնել Իրան-Հայաստան դարաւոր բարեկամական սահմանը:
Նախկին դիւանագէտ, վերլուծաբան եւ թարգմանիչ Ֆերէյդուն Մաջլեսին անդրադարձաւ «Զանգեզուրի միջանցք»-ի իրաւա-քաղաքական ասպեկտին: Վերլուծաբան եւ թարգմանիչ դոկտ. Ռահման Ղահրամանփուրը, իր ելոյթի ընթացքում անդրադարձաւ «Զանգեզուրի միջանցք»-ի հարցով Թուրքիայի նպատակներին եւ կիրառած քաղաքականութեանը: Համալսարանի դասախօս, Ռուսաստանի հարցեով փորձագէտ դոկտ. Մահմուդ Շուրին էլ անդրադրձաւ այդ հարցով Ռուսաստանի դիրքորոշմանը եւ նկատառումներին:
Վերջում ներկաներին հարցումների առիթ տրւեց:
