Հռոմի Պապը Գազայի հատւածում Իսրայէլի գործողութիւններն ահաբեկչութիւն է անւանել

Հռոմի Պապ Ֆրանցիսկոսը կիրակի ենթադրել է, որ Իսրայէլը «ահաբեկչական մարտավարութիւն» է կիրառում Գազայում՝ իր ցաւը յայտնելով իսրայէլական զինւորականների կողմից եկեղեցական համալիրում ապաստանած երկու քրիստոնեայ կանանց սպանութեան առիթով,- յայտնում է Reuters-ը:

Իր ամենշաբաթեայ օրհնութեան ժամանակ Ֆրանցիսկոս Պապը մեկնաբանել է Երուսաղէմի Լատինական պատրիարքութեան՝ Սուրբ Երկրում կաթոլիկ իշխանութեան, յայտարարութիւնը շաբաթ օրը տեղի ունեցած միջադէպի վերաբերեալ։

«Ես շարունակում եմ շատ լուրջ եւ ցաւալի լուրեր ստանալ Գազայից,- ասել է Ֆրանցիսկոս Պապը:- Անզէն խաղաղ բնակիչները ռմբակոծութիւնների եւ հրաձգութեան թիրախ են: Եւ դա տեղի ունեցաւ նոյնիսկ Սուրբ ընտանիքի ծխական համալիրի ներսում, որտեղ ահաբեկիչներ չկան, այլ կան ընտանիքներ, երեխաներ, հիւանդներ կամ հաշմանդամներ, միանձնուհիներ»։

«Ոմանք կասեն. «Սա պատերազմ է։ Սա ահաբեկչութիւն է»: Այո, սա պատերազմ է։ Սա ահաբեկչութիւն է»,- եզրափակել է նա։

Իսրայէլի արտաքին գործերի նախարարութեան ներկայացուցիչը յայտարարել է, որ միջադէպը դեռ հետաքննւում է, եւ ինքն այժմ մեկնաբանութիւն չունի Պապի խօսքի առիթով:

News.am