Կայացաւ՝ Հ. Մ. «Արարատ» կազմակերպութեան «Արարատ» պարախմբի տարեկան ելոյթը
«ԱԼԻՔ», Կ. Դ. – Երէկ՝ փետրւարի 23-ին, երեկոյեան բազմամարդ էր Հ. Մ. «Արարատ» կազմակերպութեան «Կոմիտաս» սրահը, որտեղ հանդիսատեսը եկել էր դիտելու կազմակերպութեան «Արարատ» պարախմբի սաների տարեկան ելոյթը: Աւելի քան մէկ ժամ տեւած ելոյթի ընթացքում խմբի անդամները իրենց հեզաճկուն կատարումներով հանդիսատեսին ներկայացրին ոչ միայն հայկական, այլեւ միջազգային պարացանկ: Օրւայ բացման խօսքով հանդէս եկաւ՝ Մեղրի Սարխոշեանը հակիրճ գծերով ներկայացնելով պարախմբի անցած ուղին:
Միջոցառման աւարտին հրաւիրւեց իր խօսքը փոխանցելու Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը: Նա իր գնահատանքը յայտնեց «Արարատ» պարախմբին՝ գեղեցիկ կատարումների համար եւ կարեւորեց այն հանգամանքը, որը անհրաժեշտ է կատարել այն ամէնը, որի միջոցով մեր միութիւնների յարկերի տակ գործող երաժշտական խմբերն ու պարախմբերը հնարաւորութիւն ունենան միջազգային բեմերում ներկայանալ:
