Թաւրիզի «Ծերունի Գասպարեան» կրթարանի տարեվերջի հանդէսը
Ատրպատական, ազգային առաջնորդարան, Թաւրիզ – Հովանաւորութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի, նախագահութեամբ Թեմական խորհրդի, ու նախաձեռնութեամբ ՀՕՄ-ի Թաւրիզի մասնաճիւղի, յունիսի 13-ին, ազգային առաջնորդարանի «Համազասպ Ոսկանեան» սրահում տեղի ունեցաւ ՀՕՄ-ի Թաւրիզի մասնաճիւղի «Ծերունի Գասպարեան» մանկապարտէզ-նախակրթարանի 2023-24 ուսումնական տարեշրջանի աւարտական հանդէսը, որին ներկայ էին թեմի Պատգամաւորական ժողովի եւ Թեմական խորհրդի անդամները, ազգային մարմինների եւ միութիւնների ներկայացուցիչները, ուսուցիչներ, աշակերտութեան ծնողներն ու մանկական հանդէսին ընդառաջող հայրենակիցները:
Օրւայ ծրագիրը սկիզբ առաւ Իրանի Իսլամանկան Հանրապետութեան եւ ՀՕՄ-ի հիմներգներով, որից յետոյ յանուն վարչութեան ողջոյն ու բացման խօսքով արտայայտւեց նոյն վարչութեան նախագահուհի՝ Անահիտ Մարգարեանը, իր խօսքերում անդրադառնալով աւարտւող ուսումնական տարեշրջանին:
Նա վարչութեան անունից շնորհակալութեան ու գնահատանքի խօսք ուղղեց ՀՕՄ-ի Թաւրիզի մասնաճիւղի «Ծերունի Գասպարեան» մանկապարտէզ-նախակրթարանի ուսուցչական կազմին ու պաշտօնէութեան, ուսումնական տարւայ ընթացքում նրանց տարած աշխատանքների կապակցութեամբ, բարձր գնահատելով նաեւ փոքրիկ սաների ծնողներին, կրթարանի կողքին լինելու եւ իրենց կատարած աշխատանքների ու համագործակցութեան համար:
Անահիտ Մարգարեանը անդրադարձաւ, որ ուսումնական տարւայ գրեթէ վերջին ամսում հանգստի է կոչւել բազամամեայ ուսուցչուհի՝ Նայիրի Դիլանեանը, բարձր գնահատելով նրա տարիների աշխատանքը, նրան մաղթեց առողջութիւն եւ յաջողութիւններ:
Քիչ անց բացւեց մանկական հանդիսութեան գունագեղ բեմի վարագոյրը, ուր ուսուցչուհի Անի Դիլանեանը ողջունելով ներկաներին եւ շնորհակալութիւն յայտնելով ՀՕՄ-ի Թաւրիզի մասնաճիւղի վարչութեանը, որ նախակրթարանի ուսուցչուհու հանգստի կոչւելուց յետոյ նախակրթարանի դասաւանդումը վստահւել է իրեն հանդիսականների ծափողջոյնների ներքոյ բեմ հրաւիրեց սաների երգի ուսուցիչ՝ Կարէն Սարգսեանին փոքրիկների ելոյթը սկսելու համար:
Կարէն Սարգսեանի ղեկավարութեամբ նախակրթարանի սաները կատարեցին խմբերգեր ու մեներգ եւ իւրաքանչիւրը հանդիսատեսին ներկայացաւ արտասանութեամբ:
Ծրագրի յաջորդ բաժնում սաները բեմ բարձրացան կրթական շրջանաւարտների զգեստներով եւ Ադրիէլ Աբդիշոն բարձրախօսին մօտենալով յայտարարեց, որ դասընկերներով կատարելու են «ուսուցիչ» երգը եւ այն նւիրում են իրենց հանգստի կոչւած ուսուցչուհի՝ օրիորդ Նայիրիին:
Ուսուցիչ երգի աւարտից յետոյ կատարւեց վիճակահանութիւն, որի արդիւնքում շահեց Քարմէն Աբրահամեանը, իսկ յաջորդիւ կատարւեց նախակրթարանի սաների աւարտական վկայականների տւչութիւնը Ատրպատականի հայոց թեմի պատգամաւորական ժողովի եւ Թեմական խորհրդի ատենապետներ՝ Արմինէ Վահրամեանի, Գագիկ Ջորջեանի եւ ՀՕՄ-ի Թաւրիզի մասնաճիւղի վարչութեան նախագահուհի՝ Անահիտ Մարգարեանի միջոցով:
Վկայականների տւչութիւնից յետոյ Թաւրիզի հայոց ազգային դպրոցի տեսչուհի՝ Սիլւա Օհանջանեանը ծաղկեփնջերի յանձնմամբ շնորհաւորեց ՀՕՄ-ի վարչութեան նախագահուհի՝ Անահիտ Մարգարեանին, փոքրիկ աշակերտներին եւ մանկապարտէզ-նախակրթարանի ուսուցիչներ՝ Անի Դիլանեանին ու Կարէն Սարգիսեանին եւ օգնականուհի՝ Կարինէ Գրիգորեանին 2023-24 ուսումնական տարեշրջանը յաջողութեամբ աւարտելու առիթվ:
Թեմի թեմական խորհրդի անդամ՝ Քաթրին Դիլանեանը, հանդիսականներին ներկայացրեց Ատրպատականի հայոց թեմակալ առաջնորդ՝ Տ. Գրիգոր արք. Չիֆթճեանի խօսքը 2023-24 ուսումնական տարեշրջանի առիթով, որով Սրբազան հայրը բարձր գնահատում էր բոլոր նւիրեալներին: Նա յատկապէս իր գնահատանքի խօսքը ուղղել է հանգստի կոչւած ուսուցչուհի Նայիրի Դիլանեանին, որը այնքան նւիրումով զոհաբերւել էր երեխաների դաստիարակչութեան գործում:
Հանդիսութեան աւարտին բեմ հրաւիրւեց հանգստի կոչւած ուսուցչուհի Նայիրի Դիլանեանը, որին նոյն առիթով յիշատակի նւէրներով եւ ծաղկեփնջերով ու ծաղկեկողովով գնահատեցին Ազգային իշխանութեան անունից՝ թեմի Պատգամաւորական ժողովի եւ Թեմական խորհրդի ատենապետներ՝ Արմինէ Վահրամեանը եւ Գագիկ Ջորջեանը, ՀՕՄ-ի վարչութեան անունից միութեան նախագահուհի՝ Անահիտ Մարգարեանը, «Ալիք» հաստատութեան Թաւրիզի մասնաճիւղի անունից, հաստատութեան ներկայացուցիչ՝ Արմոնդ Բադալեանը, որը նաեւ ընթերցեց հաստատութեան ուղերձը, Թաւրիզի հայոց ազգային դպրոցի տեսչուհի՝ Սիլւա Օհանջանեանը, ՀՕՄ-ի «Տաթեւ» պարային համոյթի գեղարւեստական դեկավար-բեմադրիչ՝ Կարինէ Մանուչերեանի եւ համոյթի անդամ-ուհիների անունից պարախմբի փորձավար՝ Մանէ Նազարբէգեանը, նախակրթարանի սաների ծնողների անունից Սանահին Թարվերդեանն ու «Ծերունի Գասպարեան» մանկապարտէզ-նախակրթարանի երգի ուսուցիչ՝ Կարէն Սարգսեանը:
Հանդիսութեան աւարտին ազգային իշխանութեան անունից արտայայտւեց Արմինէ Վահրամեանը, որն իր հերթին բարձր գնահատելով կազմակերպւած ծրագիրը, շնորհաւորեց ՀՕՄ-ի վարչութեանը, ՀՕՄ-ի կրթարանի ուսուցիչներին, սաներին ու նրանց ծնողներին ուսումնական տարւայ աւարտի եւ փոքրիկ սաների յաջողութեան առիթով, դրա հետ մէկտեղ շեշտելով մեր համայնքներում իւրաքանչիւր անհատի մասնակցութեան կարեւորութեանը, մեր համայնքից ներս աշխատող բոլոր կառոյցների ծրագրերին, քանի որ համայնքային կեանքի աշխուժութիւնն ու կենսունակութեան պահպանումը իւրաքանչիւր հայրենակցի պարտականութիւնն է:
Արմինէ Վահրամեանը իր խօսքերի վերջում շնորհաւորելով Նայիրի Դիլանեանին նախակրթարանի ուսուցչական աշխատանքից հանգստի կոչւելու առիթով, նրան մաղթեց յարաճուն յաջողութիւն իր կեանքի բոլոր ասպարէզներում եւ անդրադարձաւ նրա կրթական, ազգային-հասարակական, համայնքային, մշակութային եւ ժողովական կեանքում ունեցած ներդրումներին եւ մաղթեց, որ նրա գործօն մասնակցութիւնը շարունակական լինի մեր համայնքի կեանքում:
