Սպահանի եւ Ատրպատականի հայոց թեմերի առաջնորդները շնորհաւորել են նորընտիր նախագահին
Իրանի Իսլամական Հանրապետութեան
նորընտիր նախագահ
Վսեմաշուք դոկտ. Մասուդ Փեզեշքիան
Իրանի գիտակից ժողովուրդը, կրօնական ժողովրդավարութեան խթանմանը համընթաց եւ մեծ ըմբռնումով մասնակցելով ընտրութիւններին, հերթական անգամ «ԱՅՈ» ասաց անկախութեանը, ազատութեանն ու ազգային համերաշխութեանը եւ իր վստահութեան քւէն տւեց Ձեզ՝ երկրի նախագահի կարեւոր պատասխանատւութիւնը ստանձնելու համար։
Ձեր հարուստ անցեալը Իրանի յեղափոխութեան եւ Իրան-Իրաք պարտադրեալ պատերազմի, ինչպէս նաեւ Առողջապահութեան նախարարի Ձեր պաշտօնավարման տարիներում, միաժամանակ երկրի խորհրդարանի յաջորդական շրջաններում Ձեր ընտրութիւնը՝ որպէս Թաւրիզի, Ազարշահրի եւ Օսկոյի պատգամաւոր, ապացուցում են Ձեր հաւատարիմ ծառայութիւնը Իրանի Իսլամական Հանրապետութեանը։
Իրանահայերը շարունակ եղել են իրենց հայրենակիցների կողքին։ Նրանք մասնակցել են երկրում ընթացող կարեւոր իրադարձութիւններին, իսկ պարտադրեալ պատերազմի ընթացքում տւել հարիւրաւոր նահատակներ, անձնուրացներ եւ ազատամարտիկներ։
Այսու, Սպահանի հայոց թեմի եկեղեցականաց դասի, ազգային մարմինների, ողջ ժողովրդի եւ անձամբ իմ անունից շնորհաւորում ենք Ձեզ՝ Իրանի Իսլամական Հանրապետութեան նախագահի պաշտօնում ընտրւելու կապակցութեամբ եւ ամենակարող Աստծուց հայցում ենք յաջողութիւն եւ բարգաւաճում՝ Ձեր ծառայութեան բոլոր բնագաւառներում։
ՍԻՓԱՆ ԱՐՔ. ՔԷՉԷՃԵԱՆ
Առաջնորդ Սպահանի հայոց թեմի
* * *
Մեծայարգոյ նորընտիր նախագահ ԻԻՀ-եան
Դոկտ. Մասուդ Փեզեշքիան
Թեհրան
Շնորհաւորում ենք Ձեզ, արժանի ընտրութեան կապակցութեամբ Իրանի Իսլամական Հանրապետութեան նախագահի եւ երկրի գործադիր բարձրագոյն պաշտօնի, սոյն յաջողութիւնը ձեռք բերւեց ժողովրդի մեծամանութեան քւէարկութեան արդիւնքում։
Անկասկած Իրանի Իսլամական Հանրապետութեան Կրօնական Գերագոյն առաջնորդի՝ այաթ. Խամենէի եզակի ղեկավարութեամբ եւ նրա ցուցմունքներով եւ սոյն ընտրութիւնների գործադիր պատասխանատուների ցուցաբերած հոգատարութեամբ, իւրաքանչիւր տրւած քւէ, Իրանի կրօնական ժողովրդաւարութեան ապացոյցը հանդիսացաւ։
Այս առիթով, անձնապէս իմ ու Ատրպատականի հայոց թեմի Պատգամաւորական ժողովի, Թեմական խորհրդի եւ համայնքի հայութեան անունից, յաջողութիւն ենք մաղթում Ձեզ ու նաեւ Իրանի ողջ ժողովրդի նման, հայ ժողովուրդը եւս զօրավիգ է կանգնելու յանուն Իրանի բարգաւաճմանը։
Աղօթքի օրհնութեամբ՝
ԳՐԻԳՈՐ ԱՐՔ. ՉԻՖԹՃԵԱՆ
Առաջնորդ Ատրպատականի հայոց թեմի
