«ԱԼԻՔ» – Իրանի Իսլ. խորհրդարանում իրանահայութեան զոյգ պատգամաւորները՝ Արա Շահվերդաեանն ու Գեղարդ Մանսուրեանը շնորհաւորական ուղերձ են յղել Հանրապետութեան նորընտիր նախագահ Մասուդ Փեզեշքիանին՝ ընտրութիւններում տարած յաղթանակի կապակցութեամբ:
Շնորհաւորական ուղերձում մասնաւորապէս ասւած է. «Գնահատելով Իրանի ժողովրդի հզօր շարժումն ընտրութիւնները բոյկոտելու արհեստածին աժիոտաժին դիմակայելու գործում, որը բարձրացրեց համակարգի հեղինակութիւնը, իրանահայ համայնքի անունից շնորհաւորում ենք Ձեզ՝ Իրանի Իսլամական Հանրապետութեան նախագահի պաշտօնում ընտրւելու կապակցութեամբ:
Բոլոր ընտրական փուլերում Ձեր շարունակական շեշտադրումը Յեղափոխութեան առաջնորդին հետեւելու, արդարութեան, օրէնքի գերակայութեան, երկրի կառավարման գործում պաշտօնեաների միակամութեան վրայ եւ, իհարկէ, Ձեր ապրելաոճը եւ գործադիր ոլորտում փայլուն անցեալը, երկրի ապագայի նկատմամբ յոյս ներշնչեցին ժողովրդին եւ ընտրութիւններում ակտիւ մասնակցութեան պատճառ դարձան: Անկասկած, Ձեր նկատմամբ բոլորի ունեցած ճանաչողութիւնը մրցակցութիւնը վերածելու է բարեկամութեան, եւ երկրի բոլոր ուժերի համատեղմամբ ուրւագծելու է այս արժանապատիւ ժողովրդին արժանի ապագայ:
Իրանահայ համայնքը ողջունում է ժողորդի պանծալի մասնակցութիւնն ու Ձեր արժանի ընտրութիւնը, եւ Ձեր կառավարութեանը մաղթում է յաջողութիւն»:
