Բագրատ Սրբազան. «Մեր՝ կալանավայրերում գտնւելու իրական եւ բուն պատճառը դիմադրութեան հնարաւոր օջախները վերացնելն է»

«ԱԼԻՔ» – «Սրբազան պայքար»-ի առաջնորդ Բագրատ արքեպիսկոպոս Գալստանեանը նամակ է գրել ՀՀ ԱԱԾ շէնքում գտնւող «Երեւան-Կենտրոն» ՔԿՀ-ից:

Նամակը ներկայացնում ենք ստորեւ.

«Աշխարհն, այո, շուռ է եկել»,- կասէր հոգելոյս Արամաշոտ Պապայեանը։ Շուռ եկած աշխարհում է միայն, որ յայտնի «Ձուկ գողացողը», կենդանական ծագումով տարբեր անկենսագիրներ կարող են խօսել իմ եւ համակիրների, Միքայէլ Սրբազանի եւ եկեղեցու, Սամուէլ Կարապետեանի եւ այլ արժանաւոր հայորդիների մասին, ինչպէս նաեւ ստամբուլեան տրամաբանութեամբ վերլուծութիւն կատարել աշխարհաքաղաքական զարգացումների վերաբերեալ։

Այսօրւայ տեղեկութիւններն առ այն, որ յուլիսի վերջին Դուբայում տեղի է ունենալու Ալիեւ-Փաշինեան հանդիպումը, որը վերահաստատում է մեր այն տեղեկութիւնը, որ Կ. Պոլսում հէնց այս համաձայնութիւնն էին գոյացնելու «Խաղաղութեան համաձայնագիր թէ պայմանագիր» կոչւած «սեւ թուղթը» ստորագրելու համար, որի բովանդակութիւնը ցայսօր թաքցւած է հայ մարդուց։ Այս մասին տեղեկացրել էի դեռեւս յունիսի 18-ին՝ ստամբուլեան հանդիպումից առաջ՝ թէ՛ տեղի մասին եւ թէ՛ յուլիսի վերջին, օգոստոսի սկզբին հնարաւոր ստորագրութեան մասին։

Հիմա հասկացա՞ք, թէ ինչո՞ւ ենք մենք կալանավայրերում, իրական եւ բուն պատճառը՝ այն է վերացնել դիմադրութեան հնարաւոր օջախները։

Այո՛, ոչ ոքի համար գաղտնիք չի եղել, որ ես եւ շատերը յստակ ու պարզ յայտարարել ենք, որ փողոցային խաղաղ անհնազանդութեան պայքարը անհրաժեշտութիւն է եւ պահանջւած՝ չարիքը մեր երկրից հեռացնելու համար։

Մշտապէս շեշտել եմ, որ այս աղէտի մէջ Եկեղեցին վերջին խրամատն է, որը կարող է ի վերջոյ համախմբել հանրութիւնը եւ թոյլ չտալ մեր պետութեան վերջնական յանձնումը։

Պատկերը առաւել քան յստակ է, սակայն անելիքներն անորոշ։

Զգուշացնում էի, որ այս վերջնական աղէտալի գործողութիւնը տեղի է ունենալու մարդկանց արձակուրդների շրջանում, որպէսզի նոյնիսկ նկատելի չլինի «խաւարի քօղի տակ», ինչպէս եղաւ 2020 թ. նոյեմբերի 9-ի գիշերը, 2022 թ. հոկտեմբերի 6-ը, 2023 թ. սեպտեմբերի 19-24 Արցախի յանձնումը, 2024թ. ապրիլի 19-ի գիշերը, Սեւ լիճն ու Գորիս-Կապան ճանապարհի յանձնման պարագան եւ այլն։

Իսկ յիշու՞մ էք, թէ ինչ դէպք է տեղի ունեցել գիշերւայ քօղի տակ… Յուդան խաղաղութեան համբոյրով մատնեց Յիսուսին։ Հիմա նոյն «խաղաղութեան համբոյրով» մատնւում է մեր կեանքը։

Սիրելինե՛ր,

Այժմ այլեւս վաղուց ժամանակը չէ վերլուծութիւնների, փորձագիտական մեկնաբանութիւնների, քաղաքական եւ այլ տարբերութիւնների։ Մէկ կողմ թողէք ամէն բան եւ միաւորւէք յանուն Հայաստանի, յանուն պատւի եւ արժանապատւութեան, յանուն մեր նահատակների, յանուն մեր տառապանքների, յանուն մեր երազների եւ իղձերի, որոնք աւելի մեծ են քան մեր ժամանակաւոր կեանքի սահմանափակ օրերը։

Յաղթանակն այլընտրանք չունի…»: