Ատրպատականի հայոց թեմի առաջնորդը մասնակցեց Իրան-Իրաք պատերազմի յիշատակի ձեռնարկին

Ատրպատական, ազգային առաջնորդարան, Թաւրիզ –  Չորեքշաբթի, 26 Սեպտեմբեր 2024-ի առաւօտեան ժամը 9-ին, Ատրպատականի հայոց թեմի առաջնորդ Գերշ. Տ. Գրիգոր Արք. Չիֆթճեանը Թաւրիզում մասնակցեց Իրան-Իրաք ութամեայ պատերազ­մի տարելիցի առիթով մասնաւոր ծրագրի, որը տեղի ունեցաւ քաղաքի գլխաւոր եւ ամենահսկայ «Մոսալլայէ Հազրաթէ Իմամ Խոմէյնի» մզկիթում: Սրբազան հօրը ընկե­րակ­ցում էին Թեմական խորհրդի ատենապետ Գագիկ Ջորջ­եանը եւ Փոքրամասնութ­եան գրասենեակի պատասխանատուն:

Պաշտօնական հրաւիրեալների շարքում էին Թաւրիզի աղօթապետ Մոթահարի Ասըլը, Արեւելեան Ատրպատականի նահանգապետ՝ Թորաբ Մոհամմէտին, բարձրաս­տիճան բանակայիններ, նահա­տակ­ների ընտանիքների Խնամատար մարմնի պա­տաս­խանատուները, ինչպէս նաեւ կազ­մա­­կերպիչ յանձնախումբը: Սրահը լցւել էր աւելի քան հազար հրաւիրեալներով, ո­րոնց շարքին ներկայ էին նահատակների ըն­տանիքներ եւ պատերազմում վիրաւոր եւ վերապրած զինւորական ծառայողներ:

Հանդիսութիւնը համացանցի միջոցով միացւել էր մայրաքաղաքում եւ երկրի բոլոր գլխաւոր քաղաքներում տեղի ունեցող ծրագրերին, ներկաները մասնակից դարձնելու բոլոր ձեռնարկներին: Համացանցի միջոցով համայն երկրում սփռւեց կրօ­նական առաջնորդ՝ Այաթ. Խամենէի պատգամը, որը յարգելով նահատակների յիշա­տակը եւ երկար կեանք մաղթելով վերապրած զինծառայողներին, անդրադարձաւ աշխարհի քաղաքական դրւածքին եւ Իրանի Իսլամական հանրապետութեան դիր­քորոշումներին:

Ծրագրի աւարտին, նահանգապետի, աղօթապետի եւ պաշտօնական մի բուռ հրաւիրեալների շարքին բեմ հրաւիրւեց նաեւ առաջնորդ Սրբազանը, գնահատական նւէրներ բաշխելու համար նահատակների ընտանիքներին եւ վերապրած զինւորա­կաններին: Նոյն առթիւ, հրապարակաւ խօսք առաւ Մոթահարի Ասըլը, յատկապէս անդրադառնալով իրանահայ նահատակների եւ վերապրած վիրաւորներին, յիշելով որ իրանահայ ժողովուրդը միշտ զօրավիգ է կանգնել իր ծննդավայր հայրենիքին: Նա յատկապէս նշեց նաեւ, որ Ատրպատականի հայոց թեմի առաջնորդ Գրիգոր Արքե­պիս­կոպոսը, իր արտասահմանեան բոլոր ճամբորդութիւնների ընթացքում, միշտ բարձր գնահատանքով է արտայայտւում Իրանում ապրող իր ազգի զաւակների վայելած յար­գանքին եւ պետական հովանաւորութեան: Այս առթիւ կազմակերպիչ յանձնախմբի տնօրէնութիւնը յատուկ յուշանւէրով պատւեց Սրբազան հօրը. նւէրը նրան յանձնւեց Թաւրիզի աղօթապետ՝ Մոթահարի Ասըլի ձեռամբ: