Թաւրիզի «Մելիք Թանգեան թանգարան»-ի վերաբացման նախնական աշխատանքներ

Ատրպատական, ազգային առաջնորդարան, Թաւրիզ – Շաբաթ՝ հոկտեմբերի 12-ին, վաղ առաւօտեան ժամերից սկսեալ, շուրջ 40 տարիներ փակ դռների հետեւը գտնւող «Մելիք Թանգեան թանգարան»-ի գոյքերը, Ղալայի եկեղեցու շրջափակում, ազգային առաջնորդարանի «Արամեան» շէնքի պահեստամասից տեղափոխւեցին Լիլաւայի հա­­յոց «Թամարեան» հնադարեայ շէնքի երկրորդ յարկը:

Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի տարիների աշխատանքի արդիւնք հանդիսացած սոյն յաջողութ­իւնը հովանաւորւեց Իրանի Իսլամական հանրապետութեան Մշակութային ժառան­գութեան տնօրէնութեան միջոցով, որը իր պաշտօնէութեամբ ներկայ էր դարաւոր գոյքերի փոխադրման դժւարին աշխատանքին:

Նշենք, որ Թեմական խորհրդի կողմից հովանաւորւած նիւթական միջոցներով, ինչպէս նաեւ ապսպրւած չորս փոխադրակառքերով ու շուրջ երկու տասնեակ բանւոր­ներով, թանգարանի առարկաները յատուկ ապահով ծրարների մէջ ամրացւած եւ տու­փերում տեղադրւած, փոխադրւեցին իրենց համար Թեմական խորհրդի որոշած նոր վայրը:

Առաւօտեան վաղ ժամերից Թեմական խորհուրդը, գլխաւորութեամբ ատենա­պետ Գագիկ Ջորջեանի, ինչպէս նաեւ նիւթերի թւագրման պատասխանատու Սեւան սրկ. Ենովքեանի, աշխատանքը սկսեց Բերդաթաղում (Ղալա), եւ շուրջ կէս օր տեւած հաւաքական խիտ ջանքերով, թանգարանի գոյքերը փոխադրւեցին Լիլաւա:

Ձեռագրերի պատառիկներ, հնատիպ մատեաններ, եկեղեցական հնադարեայ զգեստներ, կիրառական արւեստի նմոյշներ, կրօնական իւղանկարներ, հնամենի կա­հոյ­քի օրինակներ՝ նստա­րաններ եւ գրասեղաններ, որոնք պատկանել են թեմում գործած հոգեւորական ան­ձանց, թեմի տարբեր գաւառներում եւ գիւղերում եկեղե­ցիների օրհնաձայն զանգեր, աշտանակներ, թափօրի խաչեր եւ խաչվառներ, ինչպէս նաեւ այլ թանկարժէք իրեղէններ մասնաւոր տու­փերի մէջ էին ծրարւել, ապա­հով փո­խադրման հեռանկարով: Յայտնենք, որ մինչեւ փո­խադրման սկիզբը, Թեմական խորհրդի տնօրինումով, Մշակութային ժառանգութ­եան կենտրոնը իր մասնագէտ տեղացի նկարիչ­ների ձեռամբ վերանորոգման էր ենթարկել 27 իւղանկարներ, առաջիկայ դա­րերի համար փրկելով դրանք փջացման աղէտից:

Սոյն փոխադրութիւնից յետոյ, առաջնորդ Սրբազան Հայրը ժամանեց Լիլաւայի Ս. Սարգիս եկե­ղեցին, եւ հետեւեց գոյքերին յատկացւած նոր սենեակներում տեղադրման հսկայական աշխա­տանքին: Սրբազան Հօրը ժամանման պահին նաեւ ներկայ գտնւեցին Փոք­րա­մասնութեան պատասխանատուն, ինչպէս նաեւ Պատգամաւորական ժողովի դիւանի անդամներ Արմինէ Վահրամեանը եւ Անի Մելիքեանը, մօտկից հետեւելով ցարդ ի­րականացւած ապահով աշխատանքին:

Թեմական խորհրդի ատենապետ Գագիկ Ջորջեանը մանրամասն բացատրութ­իւն տւեց առաջնորդ Սրբազան Հօրը եւ ներկաներին, ներկայացնելով այն բծախնդիր մօ­տե­ցումը, որը վաղ առա­ւօտից իրագործել էր աշխատանքային խումբը: Նա ներ­կա­յացրեց նա­եւ շէնքի եւ թանգարանային բաժնի տեսախցիկների ապահով հսկողու­թ­եան համակարգչային ձեւաչափը, ո­րը 24 ժամ տեւողութեամբ տրամադրելի է լինելու պատասխանատուներին:

Յայտնենք, որ Սրբազան Հայրն ու Թեմական խորհուրդը ժողովական մնայուն ընթացքի մէջ են պետական համապատասխան շրջանակների հետ, պաշտօ­նապէս նախա­պատրաս­տւելու «Մելիք Թանգեան թանգարան»-ի վերաբացման ծրագ­րին, որի դռները փակ­ւել էին շուրջ 40 տարիներ առաջ: