Երկուշաբթի՝ դեկտեմբերի 9-ին, ազգային առաջնորդարան այցելեցին Իսլամական մշակոյթի եւ հաղորդակցութեան կազմակերպութեան Կրօնների եւ մշակոյթների երկխօսութեան կենտրոնի հրաւէրով Թեհրան ժամանած՝ Ղազախստանի Հանրապետութեան մշակոյթի եւ տեղեկատւութեան նախարարութեան կրօնական հարցերի կոմիտէի տնօրէն՝ Նոկժանով Երժան Բուլատկանովիչը, Ղազախստանի կրօնների երկխօսութեան միջազգային կենտրոնի տնօրէնի աւագ խորհրդական՝ Բոլաթ Սարսնբայֆը եւ ընկերակցող պատւիրակութիւնը: Պատւիրակութեանը ուղեկցում էին՝ Իսլամական մշակոյթի եւ հաղորդակցութեան կազմակերպութեան փորձագէտ Ռաշիդ Բէյգին եւ կենտրոնի ներկայացուցիչները:
Նշելի է, որ Ղազախստանի պատւիրակութիւնը Թեհրան էր ժամանել մասնակցելու՝ «Կրօնների հետեւորդների պատասխանատւութիւնը գլոբալ մարտահրաւէրների դէմ պայքարում» թեմայով կազմակերպւած՝ Իսլամական մշակոյթի եւ հաղորդակցութեան կազմակերպութեան Կրօնների եւ մշակոյթների երկխօսութեան կենտրոնի եւ Ղազախստանի կրօնների երկխօսութեան միջազգային կենտրոնի սեմինարին, որը կայացաւ նոյն օրը՝ առաւօտեան, Կենտրոնի ժողովասրահում:
Ազգային առաջնորդարանում հիւրերին դիմաւորեցին՝ Իրանի Իսլամական խորհրդարանում իրանահայութեան զոյգ պատգամաւորներ՝ Արա Շահվերդեանը եւ Գեղարդ Մանսուրեանը, Պատգամաւորական ժողովի դիւանի ատենապետ Սուրիկ Աբնուսեանը, Թեմական խորհրդի ատենապետ Վարուժ Յովհաննիսեանը, Կրօնական խորհրդի ատենապետ Տ. Մաշտոց քհնյ. Խաչատրեանը եւ նոյն խորհուրդների ներկայացուցիչները նաեւ Իրանի Իսլամական խորհրդարանում՝ զրադաշտականների ու ասորի եւ քաղդեացի քրիստոնեաների պատգամաւորներ՝ Բեհշիդ Բարխորդարին եւ Շառլի Էնւիէ Թեքիէն:
Ազգային առաջնորդարանի դահլիճում կայացած հանդիպման սկզբում, Արմինէ Սէթխանեանը ուրախութեամբ ողջունեց հիւրերի ներկայութիւնը եւ դրական անդրադարձ ունենալով, գնահատեց առաւօտեան կայացած սեմինարը: Նա իր արտայայտութիւններում Իրանական հայրենիքում հայ ժողովրդի դարաւոր գոյութեանն անդրադառնալով, համապարփակ կերպով բացատրեց Իրանում ապրող հայութեան եւ կառոյցիս ընդհանուր դրւածքի, երկրի տարբեր շրջաններում պատմական վանքերի ու եկեղեցիների առկայութեան եւ հայերի ու պարսիկ հայրենակիցների միջեւ խաղաղ եւ փոխադարձ յարգանքի ու վստահութեան վրայ հիմնւած համակերցութեան մասին: Սուրիկ Աբնուսեանը նաեւ իր հերթին հանդիպման առիթն ստեղծւելու համար գոհունակութիւն յայտնեց եւ իր արտայայտութիւններում անդրադարձ ունեցաւ, հայ ժողովրդի պատմական անցեալին եւ հանգամանօրէն ներկայացրեց կառոյցն ու իրանահայ երեք թեմերը: Նա նաեւ մատնանշեց իրանահայ անւանի եւ հանրայայտ հայորդիների՝ գիտական, հասարակական, մշակութային, մարզական եւ արւեստի տարբեր բնագաւառներում ներդրած աւանդին եւ գործօն դերակատարութեանը:
Խորհրդարանի պատգամաւոր՝ Արա Շահվերդեանը իր արտայայտութիւններում ընդգծեց կրօնների երկխօսութեան կարեւորութիւնը, նշելով, որ դա նաեւ առիթ է փոխճանաչողութեան եւ այն նպաստում է ժողովուրդների համերաշխութեան եւ փոխգործակցութեան ձեւաւորմանը: Նա մասնաւոր անդրադարձ ունեցաւ Ամենայն Հայոց Կաթողիկոսութեան եւ Մեծի Տանն Կիլիկիոյ Կաթողիկոսութեան աթոռներին մատնանշելով, որ իրանահայ համայնքը ենթակայ է Լիբանանում՝ Մեծի Տանն Կիլիկիոյ Կաթողիկոսութեանը՝ գլխաւորութեամբ Արամ Ա Վեհափառ Հայրապետի, ուստի ակնկալեց եւ յոյս յայտնեց, որ Ղազախստանում գումարւող կրօնների երկխօսութեան համագումարներին, հրաւիրւեն նաեւ Կիլիկիոյ Կաթողիկոսութեան ներկայացուցիչները:
Նոկժանով Երժան Բուլատկանովիչը շնորհակալութիւն յայտնեց ջերմ ընդունելութեան եւ ներկայացւած բացատրութիւնների կապակցութեամբ եւ մատնանշեց Ղազախստանի հայ քաղաքացիների համերաշխ կեցութեանն ու քաղաքացիական իրաւունքների ազատութեանը: Նա շուտափոյթ ապաքինում ցանկացաւ Սրբազան Հօր համար եւ առիթը պատեհ համարելով շնորհաւորեց մօտալուտ Ամանորի եւ Ս. Ծննդեան տօների առիթով:
Հանդիպման աւարտին, հիւրերին նւիրւեց «Իրանի հայկական եկեղեցիներ» խորագրով՝ պարսկերէն եւ անգլերէն լեզւով հրատարակւած գիրքը, որից յետոյ այցելութիւն կատարւեց Ս. Սարգիս եկեղեցի:
Ազգային առաջնորդարանի Հանրային կապ
