Պատերազմներով, փոթորիկներով յատկանշւած 2024 տարին իր աւարտին է հասնում եւ մենք ի տես այս բոլորին փառք ենք տալիս Երկնաւոր Հօր, որ մեզ պահեց ու պահպանեց ամէն տեսակ փոթորիկներից։ Այսօրւայ աշխարհը որեւէ ժամանակից աւելի տագնապահար իր վիճակով կարիքը ունի Աստւածային միջամտութեան վասն սիրոյ եւ խաղաղութեան հաստատման մարդկային մեր կեանքի մէջ։
Բոլոր ժամանակներում նախախնամական է եղել եւ է: Աստւածային այդ միջամտութիւնը նախախնամական էր եւ Քրիստոսի ծննդեան ժամանակ հրեշտակների միջոցով իր պատգամը յղեց.-«Փառք Աստծուն բարձունքներում, խաղաղութիւն երկրի վրայ եւ հաճութիւն մարդկանց միջեւ»:
Այսօրւայ անորոշութեան մէջ ապրող մարդկութիւնը, տագնապահար ու շփոթեցուցիչ իր կեանքի մէկ հանգրւանն է ապրում։
Երկիրներ կամ ժողովուրդներ հեռացել են Աստծուց, դժբախտաբար զէնքով են խօսում միմեանց հետ պատճառ լինելով բազմահազար անմեղ մարդկանց մահւան։ Արդեօ՞ք միշտ այսպէս է եղել աշխարհը։
Դժբախտաբար այսօր մեր հայրենիքն էլ անորոշութեան եւ տագնապների առաջ է կանգնած։
Մեր հայրենիքը ամէն օր տկարանում է եւ անկարող է լինում իր երկրի ամբողջութիւնը վերահաստատել եւ այս իրողութեան դիմաց մենք բոլորս կոչւած ենք աւելի զգաստ, միասնական եւ աւետարանական սիրով իրարու հետ լինելու։
Ըստ վկայութեան պատմաբանների եւ աշխարհագիրների Քրիստոսի ծնունդը կանխող ժամանակաշրջանը բնորոշւում էր անորոշութեամբ, ճշմարտութեան փնտրտուքով, խռովեալ սրտերի գոյութեամբ։
Պօղոս առաքեալը մեզ յիշեցնում է ասելով.-«Աստւած այս վերջին օրերին մեզ հետ խօսեց իր Որդու միջոցով, որին ժառանգ նշանակեց ամէն ինչի, եւ որի միջոցով ստեղծեց տիեզերքը։ Նա որ լոյսն է նրա փառքի եւ բուն պատկերը նրա էութեան, որ իր խօսքի զօրութեամբ հաստատ է պահում տիեզերքը» (Եբր. 1։2-3) Այսօր երբ դիտում ենք մեր շրջապատը մտավախութեամբ ենք լցւում, որովհետեւ տեսնում ենք թէ ինչպէս աշխարհը այս օրերին առաւել եւս փոթորկւած է եւ ալեկոծւած ու կարծէք դրա համար զգացւում է հրեշտակների քաղցրաբոյր երգի կարօտը ու աւելի ցանկալի է դառնում, քանի որ այդ մեղմանուշ երգի հնչիւնները յոյս են ներշնչում խռովեալ մարդկութեան սրտերին։
Այս օրերին մենք էլ իբրեւ ժողովուրդ դարերից եկած մեր հաւատքով մենք մեզ զօրացրել ենք Քրիստոսի կեանքից մեզի եկող հաւատքով, սիրով եւ յոյսով։
Չարչարալից մեր ժողովուրդի կեանքը, մեզ զօրացրել է մեր հաւատքի եւ յոյսի մէջ, այսօր եւս մեր ժողովուրդը հայրենիքի մէջ թէ հայրենիքից դուրս տագնապահար է ու խաղաղութեան փնտրտուքով ուզում է ինքն իրեն զօրացնել։ Դժբախտաբար մենք այնքան թոյլ ու տկար ենք, որ դժւարանում ենք որեւէ մէկ ձեւով մեզ ուղիղ ընթացքի մէջ պահենք ու պահպանենք, գորշ ամպերը Դամոկլեան սուրի պէս մեր հայրենիքի վրայ է եւ դժբախտաբար չենք անդրադառնում այս բոլորին։
Քրիստոսի Ս. Ծննդեան եւ Աստւածայայտնութեան լուսաւոր խորհուրդը մեզ պէտք է լուսաւորի, որպէսզի կարողանանք իրապէս ծնեալ Փրկիչը մեր մէջ ունենալով եւ իր սիրով վառւած ձեռք ձեռքի տանք եւ գործենք յանուն խաղաղութեան մեր ժողովրդի միասնականութեան եւ խաղաղ կեանքի ի խնդիր։
Մենք հաւատացած ենք, ինչպէս մեր հայրերը մեզ սովորեցրին, որ Քրիստոսով ապրող եւ շնչող հաւատացեալները կը կարողանան ի վերջոյ յաղթահարել ամէն տեսակ դժւարութիւն եւ դժբախտութիւն։
Ծննդեան խորհրդով պարուրւած այսօրւայ աշխարհը կարիքը ունի իրական խաղաղութեան, կարիքը ունի իրական սիրոյ եւ կարիքը ունի անկեղծ եղբայրութեան։
Աղօթենք, որ Բեթղեհէմի երկնակամարի վրայ փայլող լուսաւոր աստղի լոյսը մեզ եւ ողջ մարդկութեան լուսաւորի եւ այրի այն բոլոր զգացումները եւ ապրումները, որ մարդս առաջնորդում է դէպի խորխորատ։
Մենք եւս այս օրերում հրեշտակների բառերով փառք տանք Աստծուն եւ խնդրենք, որ սիրոյ ու միութեան զգացումներով զօրացնի մեզ մեր առաքելութեան մէջ։
Ես այս առիթով ուզում եմ նաեւ իմ երախտագիտական զգացումները յայտնել Ն.Ս.Օ.Տ.Տ. Արամ Ա կաթողիկոսին եւ բոլոր իմ այն միաբանակից եղբայրներին՝ աւագ թէ կրտսեր, որոնք իմ անհանգստութեան առիթով աղօթքով իրենց զօրակցութիւնը յայտնեցին ինձ։
Ահա այս զգացումներով ու մտածումներով ուզում եմ ողջունել մեր ժողովրդի զաւակներին, որտեղ որ կան եւ բոլորին մաղթել սէր, խաղաղութիւն եւ երկնային շնորհ։
Շնորհաւոր Նոր Տարի եւ Ս. Ծնունդ.
Քրիստոս ծնաւ եւ յայտնեցաւ
Ձեզ եւ մեզ մեծ Աւետիս. Ամէն:
ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
5 յունւար 2025
Թեհրան
