Չորեքշաբթի՝ 8 յունւարի 2025 թւականի առաւօտեան, Սպահանի ոստիկանական ուժերի եւ ենթակայ ստորաբաժանումների պետեր գլխաւորութեամբ փոխոստիկանապետ գեներալ Հաշեմիֆառի այցելեցին Նոր Ջուղայի հայոց գերեզմանատուն։
Հիւրերին ընդունեցին Կրօնական խորհրդի ատենապետ Զաւէն Սիմոնեանը, Պատգ. ժողովի դիւանի անդամ Նորւիկ Պօղոսեանը, Թեմական խորհրդի անդամ Տարօն Տէր Մարտիրոսեանը եւ թեմիս նահատակների եւ անձնուրացների հարցերով կապ Զարեհ Ղարախանեանը։ Ներկայ էին նաեւ երկու հայ նահատակների ընտանիքներ։
Ամանորի եւ Ս. Ծննդեան տօների առթիւ կատարւած այս այցի ընթացքում Իրան-Իրաք պատերազմի հայ նահատակների յիշատակին կանգնեցւած կոթողի մօտ քահանայից ու դպրաց դասերի մասնակցութեամբ տեղի ունեցաւ հոգեհանգստեան արարողութիւն, որի աւարտին ներկաները ծաղիկներ զետեղելով յուշաքարի մօտ, մեծարեցին նահատակների անմոռաց յիշատակը։
Այնուհետեւ պատւիրակութեան անդամները ժամանեցին Ս. Ամենափրկիչ վանք՝ ազգային առաջնորդարան։ Հիւրերին Ծաղկեայ դահլիճում դիմաւորեցին թեմակալ Առաջնորդ Տ. Սիփան արք. Քէչէճեանը, Պատգ. ժողովի ատենապետ Նոէլ Մինասեանը, Կրօնական եւ Թեմական խորհուրդների անդամներ Տէր Մեսրոպ աւագ քահանայ Գալստանեանն ու Վաչիկ Հայրապետեանը։
Ներկաներին ողջունեց թեմակալ առաջնորդ Սրբազան Հայրը։ Նա ափսոսանքով արտայայտւեց Ոստիկանական ուժերի հրամանատար Համիդ Ալինաղիանփուռի բացակայութեան մասին, որը տեղի էր ունեցել յիշեալի հօր մահւան պատճառով եւ խնդրեց իր եւ ազգային մարմինների ցաւակցական խօսքը փոխանցել հրամանատարին։ Այնուհետեւ իր երախտագիտութիւնը յայտնեց այս կառոյցին հայ համայնքի նկատմամբ ցուցաբերած յատուկ խնամքի եւ ի մասնաւորի Ամանորի ու Ս. Ծննդեան տօների օրերին Ս. Ամենափրկիչ վանքի շրջափակի եւ հայկական թաղամասի անվտանգութիւնը ապահովելու եւ տօնական օրերի առթիւ հայ զինւորներին արձակուրդ տալու կապակցութեամբ։
Փոխոստիկանապետ գեներալ Հաշեմիֆառը շնորհաւորելով Նոր տարին եւ Ս. Ծնունդը, ընդգծեց հայ եւ պարսիկ հայրենակիցների միջեւ առկայ համակեցութիւնը եւ վստահեցրեց, որ Իրանի իշխանութիւնները խտրականութիւն արտայայտող որեւէ վերաբերմունք չեն դրսեւորել հայ համայնքի նկատմամբ, իսկ եթէ կան հակառակ տեսակէտներ, դրանք մեր միասնականութիւնը խախտող թշնամիների նենգ գործունէութեան արդիւնքն են, որոնց նկատմամբ պէտք է զգուշաւոր լինել։
Պատգամաւորական ժողովի ատենապետ Նոէլ Մինասեանը եւս ողջոյնի խօսքերից յետոյ շնորհակալութիւն յայտնեց Ոստիկանական ուժերին հասարակական կարգը պահպանելու, յատկապէս տօնական օրերին հայկական թաղամասի ապահովութիւնը երաշտաւորելու, ինչպէս նաեւ իրենց զինւորական ծառայութիւնն անցկացնող հայ երիտասարդների նկատմամբ ցուցաբերած ուշադրութեան համար։
Վերջում ձեռամբ թեմակալ առաջնորդի յուշանւէր յանձնւեց փոխոստիկանապետին եւ հանդիպումն աւարտւեց խմբական լուսանկարով։
Հանրային Կապ
Սպահանի հայոց թեմի ազգային առաջնորդարանի
