Ամանորի եւ Ս. Ծննդեան տօների առիթով, ուրբաթ՝ յունւարի 10-ին, ազգային առաջնորդարան այցելեցին Թեհրանի նորանշանակ Նահանգապետ Մոհամմադ Սադեղ Մոթամեդիանը եւ նրան ընկերակցող պատւիրակութիւնը:
Ազգային առաջնորդարանի դահլիճում հիւրերին դիմաւորեցին՝ Տ. Ստեփանոս ծ. վրդ. Փաշայեանը, Տ. Առաքել աբղ. Գատեհճեանը, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թ. Հ. Թ. Պատգամաւորական ժողովի դիւանի ատենապետներ՝ Սուրիկ Աբնուսեանը եւ դոկտ. Սեւակ Հաթամեանը, Թեմական խորհրդի ատենապետ Վարուժ Յովհաննիսեանը, նոյն խորհրդի դիւանի ներկայացուցիչներ՝ Հայրիկ Աղանեանը, Մհեր Օհանեանը եւ Շահէն Յարութիւնեանը նաեւ ազգային առաջնորդարանի դիւանապետ՝ Զօրիկ Կարապետեանը:
Տ. Ստեփանոս ծ. վրդ. Փաշայեանը՝ Թեհրանի հայոց թեմի առաջնորդ Տ. Սեպուհ արք. Սարգսեանի հայրական ողջոյնները փոխանցեց եւ շնորհաւորելով նորանշանակ Նահանգապետին՝ ստանձնած նոր պաշտօնի առիթով, յաջողութիւն, բարի առաքելութիւն եւ յարատեւ վերելք մաղթեց նրան: Հայր Սուրբն իր արտայայտութիւններում անդրադարձ ունեցաւ իրանահայ համայնքի Իրանում ունեցած դարաւոր անցեալին եւ հայ ու իրանցի ժողովուրդների բարեկամութեան խոր արմատներին եւ առկայ սերտ յարաբերութիւններին ու բարեկամութեանը, որը վստահաբար նոյնութեամբ շարունակւելու եւ գոյատեւելու է:
Թեհրանի Նահանգապետ Մոհամմադ Սադեղ Մոթամեդիանը Ամանորի եւ Ս. Ծննդեան տօների առիթով, շնորհաւորանքի խօսքեր փոխանցեց եւ շնորհակալութիւն յայտնեց ջերմ ընդունելութեան համար: Նա անդրադառնալով Իրանի հայկական եկեղեցիների վաղեմիութեան նշեց, որ դրանք Իրանում՝ իրանահայ համայնքի դարաւոր գոյութեան ապացոյցն են: Թեհրանի Նահանգապետն իր արտայայտութիւնների ընթացքում արժեւորեց Իրան-Իրաք պարտադրեալ պատերազմում նահատակւած, գերեւարւած եւ վիրաւորւած հայ նահատակներին եւ նրանց ընտանիքներին: Նահանգապետն այցի ընթացքում յայտնեց, որ Թեհրանի նահանգապետարանը անհրաժեշտ միջոցներ կը ձեռնարկի հայ համայնքի խնդիրների լուծման համար:
Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը նաեւ իր հերթին ողջունելով, շնորհակալութեան խօսք ուղղեց՝ կատարւած այցի եւ ցուցաբերւած ուշադրութեան համար: Նա երախտագիտութեամբ անդրադարձաւ տօնական օրերի առիթով իրականացւած այցելութիւններին մատնանշելով, որ դա ինքնին վկայութիւն է պետութեան եւ փոքրամասնութիւնների միջեւ առկայ փոխյարգանքի եւ համագործակցութեան, որը հարկ է աւելի սերտացնել:
Հանդիպման աւարտին, հիւրերին նւիրւեց «Իրանի հայկական եկեղեցիներ» խորագրով՝ պարսկերէն եւ անգլերէն լեզւով հրատարակւած գիրքը, որից յետոյ այցելութիւն կատարւեց Սուրբ Սարգիս եկեղեցի:
Ազգային առաջնորդարանի Հանրային կապ
