Ս. Ծննդեան պետական շնորհաւորական Ուրմիայի հայոց եկեղեցու սրահում
Ատրպատական, ազգային առաջնորդարան, Թաւրիզ – Երեքշաբթի՝ յունւարի 7-ի ժամը 4:00-ին, հովանաւորութեամբ եւ նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի, Ուրմիայի Ս. Ստեփանոս եկեղեցու «Արամ Մանուկեան» սրահում տեղի ունեցաւ Ս. Ծննդեան տօնի յատուկ ընդունելութիւն, ներկայութեամբ պետական բարձրաստիճան հիւրեր, մուսուլման պատասխանատու կրօնաւորներ, ինչպէս նաեւ Ասորական համայնքի կրօնական եւ աշխարհական ներկայացուցիչների:
Հիւրերին ընդունեցին Թեմական խորհրդի ատենապետ Գագիկ Ջորջեանը, Գործակալական խորհրդի անդամները, գլխաւորութեամբ ատենապետ Վանիկ Յակոբեանի: Սրահում ներկայ էին բոլոր գիւղերի Հոգաբարձական եւ Խնամակալական մարմինների ներկայացուցիչները, Ազգային բարերար Էդիկ Մեջլումեանը, ՀՕՄ-ի, «Արարատ»-ի եւ բոլոր միութիւնների վարչութիւնները, Ուրմիայի հայոց «Մասիհա» դպրոցի տեսչուհի Ադրինէ Մեջլումեանը, ինչպէս նաեւ «Նայիրի» մանկապարտէզ-նախակրթարանի տեսչուհի Ռոնիկ Մեջլումեանը:
Բացման ու բարի գալստեան խօսքով ներկաներին ողջունեց Պատգամաւորական ժողովի Բ ատենադպրուհի՝ Սարինէ Մեջլումեանը: Նա յատկապէս նշեց, որ իւրաքանչիւր տարի, Սուրբ Ծննդեան աստւածաշնորհ տօնի առիթով կազմակերպւած սոյն ընդունելութիւնը առաւել եւս զօրացնում է քրիստոնէական համայնքների, որոնց շարքում հայ համայնքի գոյութիւնը, եւ հաւատարմութիւնը իրանական հայրենիքի նկատմամբ:
Բեմ հրաւիրւելով, առաջնորդ Սրբազանը հայերէն եւ թուրքերէն լեզուներով իր պատգամը յղեց բոլոր ներկաներին: Սրբազան Հայրը նախ երախտագիտութիւն յայտնեց Իրանի Իսլամական Հանրապետութեան բոլոր ղեկավարներին, որոնք երբեք չեն մոռանում երկրում դարաւոր ներկայութիւն եղող փոքրամասնութիւններին: Սրբազան Հայրը աշխարհի խաղաղութեան համար բարեմաղթանքի հետ, յատկապէս յիշեց, որ Յիսուս Փրկչի Սուրբ Ծննդեան տօնը առիթ է անդրադառնալու, մարդկութեան միջեւ խաղաղութիւնը վերահաստատելու. «Մարդը իր անաստւածութեան մտորումներով չարանում է, եւ նոյնիսկ աշխարհի Խաղաղութեան Իշխանի՝ Յիսուսի Ծննդեան աւետիսը չի լսում» ասաց Սրբազան Հայրը, շեշտելով, որ Իրանի Իսլամական Հանրապետութեան ղեկավարների յարգանքը քրիստոնէական համայնքների նկատմամբ, աշխարհին ուղղւած համերաշխութեան պատգամ է:
Քրիստոնէական համայնքներին եւ յատկապէս հիւրընկալ հայ համայնքին ուղղւած շնորհաւորական խօսքով հանդէս եկաւ Արեւմտեան Ատրպատականի նահանգապետի քաղաքական հարցերի խորհրդական դոկտ. Էբրահիմի: Նա ողջունելով ներկաներին, յատկապէս նշեց Սրբազան Հօր խաղաղասիրութեան պատգամը օրինակ դարձնելու անհրաժեշտութիւնը:
Ընդունելութեան պաշտօնական բաժնի աւարտին, Խնամակալ մարմնի միջոցով հիւրասիրւեցին բոլոր ներկաները, մտերմաբար եւս շնորհաւորելով քրիստոնէական համայնքների տօնական օրերը, յատկապէս Սուրբ Ծննդեան շնորհաբաշխ օրերին:
