Միաւորելով երիտասարդութիւնն ու մարզական ոգին. Համահայկական ձմեռային խաղերի ձնամարտի մրցաշարի յաղթողը Թեհրանի թիմն է

«ԱԼԻՔ» – Համահայկական ձմեռային երկրորդ խաղերի Թեհրանի թիմը մասնակցում է երեք մրցաշարի` ձնամարտ, լեռնադահուկ եւ սնոուբորդ: 

«Արմենպրես»-ի հետ զրոյցում Համահայկական խաղերի համաշխարհային կոմիտէի անդամ եւ Իրանի ներկայացուցիչ Հենրիկ Խալոյեանը կարեւորեց խաղերի համախմբող գաղափարը: 

«Իսկապէս բացառիկ են այս խաղերը, քանի որ դեռեւս 25 տարի առաջ, երբ ստեղծւեցին Համահայկական խաղերը, միշտ էլ մեծ ոգեւորութիւն ենք տեսնում մասնակիցների մօտ: Այստեղ միաւորւած են երիտասարդութիւնն եւ մարզական ոգին: Ձմեռային խաղերի բարդութիւնը կայանում է նրանում, որ այժմ դպրոցների եւ համալսարանի դասերի փուլ է, եւ հայկական միութիւնների անդամները չեն կարող բաց թողնել դրանք»,-ասաց Խալոյեանը:

Վերջինիս խօսքով` ձմեռային երկրորդ խաղերի մասնակիցների թիւը եռապատիկ աւելի է, քան առաջինում էր, ինչը խօսում է համայնքների հետաքրքրւածութեան մասին: 

Թեհրանի ձնամարտի թիմի մարզիչ Արամազդ Բաբային, ով առաջին անգամն էր մասնակցում Համահայկական ձմեռային խաղերին, մեծ ոգեւորւածութեամբ է մասնակցում ձնամարտի մրցաշարին: 

«Ինքս էլ ընդգրկւած էի Իրանի ժայռամագլցման թիմում եւ գիտեմ սպորտի կարեւորութեան մասին: Այստեղ ձնամարտի թիմում ընդգրկւած են տարբեր մարզաձեւերի ներկայացուցիչներ` ֆուտբոլից, բասկետբոլից: Առաջին անգամն է, որ մասնակցում ենք ձմեռային խաղերին, սակայն Թեհրանի բոլոր թիմերը միշտ էլ մրցակցութիւն են ապահովել Համահայկական խաղերում»,-ասաց Արամազդ Բաբային:

Անդրադառնալով Համահայկական խաղերի գաղափարին՝ Թեհրանի ներկայացուցիչն առանձնացրեց, որ հայկականութեան միջավայրում  ստեղծւում են առաւել ուժեղ կապեր աշխարհի տարբեր երկրներից հայրենիք ժամանած մասնակիցների հետ: 

Համահայկական ձմեռային երկրորդ խաղերում Իրանից ժամանել է մեկ թիմ` Թեհրանից, որը դարձաւ ձնամարտի մրցաշարի յաղթող: 

Իսկ  2023 թւականի Համահայկական 8-րդ ամառային խաղերին Իրանի ամբողջական պատւիրակութեան կազմում էր մօտ 230 անձ: