ՀՕՄ-ի Ուրմիայի մասնաճիւղի Բարեկենդանի ժողովրդական հաւաքը
Ատրպատական, ազգային առաջնորդարան, Թաւրիզ – Կիրակի՝ մարտի 2-ին, հովանաւորութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի, Հայ Օգնութեան միութեան Ուրմիայի մասնաճիւղի վարչութիւնը կազմակերպել էր Բարեկենդանի ժողովրդական հանդիսութիւն, որը տեղի ունեցաւ Ս. Ստեփանոս ծխական եկեղեցու «Արամ Մանուկեան» սրահում:
Բարեկենդանի յատուկ զարդարանքով յարդարւած սրահի սեղանները լցւել էին ճոխ ուտեստներով, քաղցրաւէնիքի տեսակներով եւ հիւրասիրութեան այլ նիւթերով: Սրահում յատկապէս նախապատրաստւել էին տօնի յատուկ դիմակները եւ վիճակախաղի համար դասաւորւած նւէրները:
Ծրագրի սկզբնաւորութեան ժամից սրահը լցւել էր մեծ թւով ուրմիահայերով: Լինէթ Մեջլումեանը բացման խօսք կատարելով, ՀՕՄ-ի վարչութեան անունից բարի գալստեան մաղթանք ուղղեց ներկաներին, միաժամանակ Բուն Բարեկենդանի եկեղեցական ու ազգային աւանդութիւնների մասին տեղեկութիւններ հաղորդեց: Նա իր խօսքում անդրադարձաւ տօնի բուն իմաստին, իբրեւ նախապատրաստութիւնը Մեծ պահքի քառասնօրեակին: Այս առթիւ նաեւ բացատրութիւններ տւեց սեղանների յարդարանքի մասին, որոնք ազգային եւ հոգեւոր իմաստ էին պարունակում, ներկայացնելով մեր դարաւոր աւանդութիւնները:
Լինէթ Մեջլումեանը առիթը յարմար նկատեց նաեւ խօսելու Սրբոց Վարդանանց տօնի մասին, որը նախորդ շաբաթւան էր զուգադիպել: Նա շեշտեց, որ նրանց հաւատամարտը այն կարեւոր իրադարձութիւնն էր մեր պատմութեան, որի պատճառով մեր քրիստոնէական հաւատքը վառ է մնացել մեր ազգի կեանքում:
Ծրագրի ընթացքում, ներկաները հիւրասիրւեցին քաղցրաւէնիքով, յատկապէս պատրաստւած պատառներով եւ մրգերով, միաժամանակ վայելելով երաժշտութիւն, որի ընթացքում նաեւ պարեցին հայկական խմբապարեր, զրուցեցին իրար հետ, ինչպէս նաեւ զբաղւեցին դիմակախաղով:
Ըստ աւանդութեան, բոլոր ներկաները հիւրասիրւեցին խաշած ձւերով, որպէսզի դրանով փակւի իրենց բերանները պահեցողութեան համար, եւ Յիսուսի Սուրբ Յարութեան տօնին վերաբացւի կենդանական ուտեստների դիմաց:
ՀՕՄ-ի Ուրմիայի մասնաճիւղի կազմակերպած սոյն ծրագիրը իր եզրափակման հասաւ ուրախ մթնոլորտում, երբ ներկաները քաղցր յուշեր իրենց մտքում եւ հոգում շալակած վերադարձան իրենց տները:
