Ատրպատականի հայոց թեմի առաջնորդ Սրբազանը Կարմիր Մահիկի տնօրէնին ընդունեց Ս. Թադէի վանքում
Ատրպատական, ազգային առաջնորդարան, Թաւրիզ – Երկուշաբթի, մարտի 24-ի առաւօտեան, Ս. Թադէի վանքի իր խուցին մէջ, Ատրպատականի հայոց թեմի առաջնորդ Տ. Գրիգոր արք. Չիֆթճեանը ընդունեց, Արեւմտեան Ատրպատականի Կարմիր Մահիկի գործադիր տնօրէն Մահբուբիի պաշտօնական այցը: Բարձրաստիճան հիւրին ընկերակցում էին, փոխտնօրէն Խալիլին, նոյն կազմակերպութեան Չալդրանի տնօրէնը, նոյն շրջանի փոխտնօրէն Ալիփուրը, եւ նրանց օգնականները:
Հանդիպումը առիթ հանդիսացաւ անդրադառնալու Ս. Թադէի հնաբոյր վանքի մեծ հետաքրքրութեան, որը քրիստոնեայ հանրութիւնից բացի ներգրաւում էր մուսուլման ժողովուրդներին, որոնք իրանական նոր՝ 1404 տարւայ արձակուրդի օրերին, երկրի տարբեր քաղաքներից ժամանել էին Ս. Թադէ, եւ հմայւած նայում էին վանական համալիրին եւ տաճարի բարձրաքանդակներին:
Առաջնորդ Սրբազանը բարձր գնահատեց Կարմիր Մահիկի նւիրեալ ծառայութիւնը, յատկապէս տօնական եւ արձակուրդի օրերին: Սրբազան Հայրը յատկապէս վեր առաւ նոյն կազմակերպութեան բացառիկ նւիրումը Ս. Թադէի եռօրեայ ուխտագնացութիւնների օրերին, երբ նրանք գիշեր-ցերեկ մնայուն հոգածութիւն են ցուցաբերում Վանքում ուխտաւոր բազմութեան:
Ընդհանուր տնօրէն Մահբուբին, Սրբազան Հօրից իմացաւ ուխտագնացութեան օրերի ճշգրիտ թւականը, եւ կազմակերպութեան ամբողջական պատրաստակամութիւնը յայտնեց, եռօրեայ ծառայութիւն մատուցելու ուխտաւոր բազմութեանը, նրանց բժշկական կարիքի համաձայն:
